Մոսկվան ձգում է Փաշինյանի կոկորդին գցած օղակը՝ չխնայելով նույնիսկ Աննային

Մոսկվան սկսել է կոշտացնել կեցվածքը Երևանի նկատմամբ։ Այս մասին վկայում են ռուսական մեդիայում վերջին օրերին իրականացված իսկական արշավը Փաշինյանի իշխանությունների դեմ։ 

Հետաքրքրական է այն, որ այս արշավի շրջանակում Կրեմլում որոշել են չխնայել ոչինչ և ոչ մեկին։ Հայկական հասարակությանը բավական լավ հայտնի փորձագետ, «Ազգային պաշտպանություն» հանդեսի խմբագիր Իգոր Կորոտչենկոն «168 ժամ»-ին տված հարցազրույցում բավական թափանցիկ ակնարկներ է արել` հասկացնելով Մոսկվայի ընդհանուր տրամադրվածությունը Երևանի հանդեպ և ակնկալիքները Փաշինյանի իշխանություններից։

Հետաքրքրական է այն, որ Սիրիա հայկական զորախումբ ուղարկելը ռուս փորձագետը համարել է զուտ միայն հայ-ռուսական հարաբերությունների բարելավման քայլ, մի տեսակ՝ փոխհատուցում Փաշինյանի իշխանության գալուց հետո հայ-ռուսական հարաբերություններում նկատված սառեցման կամ լարվածության։ Սակայն այս քայլը Կրեմլը երբեք չի դիտարկում որպես ՀԱՊԿ-ում Երևանի դիրքերն ուժեղացնող գործոն, քանի որ ՀԱՊԿ Գլխավոր քարտուղարի ժամանակավոր պաշտոնակատար Սեմերիկովը շարունակելու է պաշտոնավարել այնքան ժամանակ, մինչ ավարտվի Հայաստանի քվոտայի ժամկետը, որից հետո արդեն, ըստ ռոտացիոն կարգի, քվոտան կանցնի Բելառուսին, և կհաստատվի Զասի թեկնածությունը։

Այսինքն, Կորոտչենկոյի բերանով Կրեմլը հայտարարում է, որ Սիրիա զորախումբ ուղարկելու դիմաց Երևանը որևէ ակնկալիք չպետք է ունենա ՀԱՊԿ-ում սեփական դիրքերի ամրապնդման հետ կապված։

Ինչը որ շատ հետաքրքրական է, այն էր, որ Կորոտչենկոն գրեթե մեղադրում է Հայաստանի ռազմական գերատեսչության ղեկավարին և վարչապետի տիկնոջը՝ Աննա Հակոբյանին՝ այլ պետության դեսպանատան հովանու ներքո գործող կառույցին անդամակցելու մեջ, կառույց, որը հայ-ռուսական հարաբերությունների հանդեպ այնքան էլ դրական տրամադրվածություն չունի։

Այլ կերպ ասած՝ Մոսկվան սկսել է ձգել Փաշինյանի կոկորդին գցված օղակը և չի խնայում նույնիսկ նրա կնոջը՝ գրեթե լրտեսության մեղադրանքներ ներկայացնելով, դրանով իսկ հիմնավորելով Երևանի հանդեպ վերաբերմունքի իր փոփոխությունը։ Ընդ որում ռուս փորձագետը շատ բաց տեքստով կրկին հայտարարել է, որ իրենց համար Հայաստանում տեղի ունեցածը սովորական գունավոր հեղափոխության սցենարային վարիացիա էր և ակնարկել, որ Երևանին չի հաջողվելու նստել մի քանի աթոռի վրա միանգամից։

NEWSPRESS.am