Քծնանքով համեմված աջափսանդալ, կամ՝ կառավարության ծրագրի քննարկումը շարունակվում է

Շաբաթներ առաջ մամուլում լուրեր տարածվեցին, թե Փաշինյանն իր թիմակիցներին կարգադրել է հնարավորինս քիչ հանդես գալ մամուլով։

Ընթերցողները հավանաբար հիշում են դրանից հետո ԱԺ-ում հայտնի դեպքերը, երբ փաշինյանական թիմի պատգամավորները «մեկը կաղ», «մյուսը խուլ», իսկ երրորդի էլ՝ «վիզը ծուռ» պատճառաբանություններով խույս տվեցին լրատվամիջոցների ներկայացուցիչներից։ Դա եղավ պատգամավոր Թագուհի Ղազարյանի «դարակազմիկ» հարցազրույցից հետո։

Սակայն պարզվում է, որ Թագուհի Ղազարյանը միակը չէ 88 հոգանոց «իմքայլականների» խմբակցությունից։ Արդեն երկրորդ օրը շարունակվող կառավարության ծրագրի ԱԺ քննարկումներում պարզ դարձավ մեկ բան՝ Փաշինյանի բերած պատգամավորները բովանդակազուրկ են հիմնականում, եւ եթե մի քիչ երկարեն այս քննարկումները, ԱԺ-ն նրանց համար կարող է դառնալ ինքնախայտառակման հարթակ։ Որեւէ նորմալ երկրում կառավարության ծրագրի քննարկումը նախ եւ առաջ լինում է բովանդակային լուրջ հարթությունում, նույնիսկ գաղափարական պայքարով ուղեկցված։ Ի վերջո, եթե կուսակցությունը հաղթում է ընտրություններում, նա իր գաղափարախոսությանը համահունչ ծրագիր է կազմում։ Օրինակ, եթե կուսակցությունը աջ-պահպանողական է, կամ ձախ-սոցիալիստական, կամ լիբերալ-դեմոկրատական կամ պացիֆիստական՝ ըստ այդմ էլ ծրագիր է գրում եւ ներկայացնում պառլամենտ, որտեղ արդեն գաղափարական-բովանդակային քննարկումներ, քննադատություններ են տեղի ունենում։

Սովորաբար այդպես է, քանի որ պառլամենտներում այլ քաղաքական գաղափարախոսությունների հետեւող կուսակցությունների ներկայացուցիչներ էլ կան, որոնք նույնիսկ մեկ հարցը տարբեր լուծումներով են տեսնում, ըստ սեփական գաղափարախոսության։ Մեզ մոտ, սակայն, ամեն ինչ մի այնպիսի տրամաբանությամբ է առաջ գնում, որը կարելի է որակել որպես՝ «աջափսանդալ՝ համեմված քծնանքով»։ Որքան էլ ժողովրդի վստահութան քվեն շահարկեն՝ սա ցույց է տալիս, որ պառլամենտը պարզապես գաղափարական իմաստով սնանկ է, իշխանությունը գափարախոսություն չունի եւ այս իրավիճակում անձակենտրոն բեեւռացված դաշտը էլի շարունակելու է գոյատեւել քաղաքական թատերաբեմում։

NEWSPRESS.am