Խայտառակություն Ջաջուռում․ Մինասի թանգարանում նկարները փչանում են ցրտից, իսկ պետությունն անհաղորդ է (լուսանկարներ)

2019 թվականի փետրվար, Ջաջուռ, դատարկ ու սպիտակ պատեր, ցուրտ շենք ու լքված միջավայր։ Այո, մենք գտնվում ենք Մինաս Ավետիսյանի տուն-թանգարանում։

Թանգարանի սենյակներից մեկում իրար կողքի, էլեկտրական վառարանի դիմաց կուչ են եկել Մինասի տուն-թանգարանի աշխատակիցները, քանի որ հսկա շենքում չկա ջեռուցում, իսկ իրենք էլ ցրտից պատսպարվելու համար հավաքվել են այստեղ։

Մեզ տեսնելուն պես ուրախացան, սակայն երբ նշեցինք, որ ցանկանում ենք տեսնել Մինասի որմնանկարներն ու նկարները, նրանք ասացին, որ չենք կարող, քանի որ օրիգինալ նկարները հավաքել են։

Միգուցե այս ամենը ֆանտաստիկայի ժանրից թվա, սակայն հայ իրականության մեջ 20-րդ դարի ամենահանճարեղ նկարիչներից մեկի՝ Մինաս Ավետիսյանի թանգարանում ցուցադրված գրեթե ոչինչ չկա։ Սպիտակ ու դատարկ պատերն են, պատերից կախված թելերն ու ցրտից դողացող սենյակը։ Աշխատակիցները նշում են, այսպես ողբերգական է ամեն ինչ, քանի որ գյուղում գազ չկա։ Նոյեմբեր ամսից սկսած՝ թանգարանում գրեթե այցելություն չկա։

NEWSPRESS.am-ը զրուցեց Մինաս Ավետիսյանի տուն-թանգարանի աշխատակիցներից Մխիթար Մխիթարյանի հետ, ով մանրամասն ներկայացրեց, թե իրականում ինչ քաոսային վիճակ է թանգարանում։

«Արդեն 25 տարի է, ինչ գյուղում գազ չկա։ Բայց գազատարն անցնում է գլխավոր ճանապարհով։ Արդեն 25-30 տարի է, որ էս հարցը միշտ շոշափվում է, բայց լուծում չկա։ Էս հարցի մասին մարզպետարանը տեղյակ է, ու միշտ տեղեկացնում ենք։ Մեր կողքի գյուղերում՝ Կամոյում, Շիրակում գազ կա, բայց մեր գյուղում չկա։ Որքանով ես գիտեմ, ասում են, որ գյուղի բյուջեն չունի բավարար գումար։ Նոյեմբեր ամսից սկսված թանգարանը փակվում է։ Փակվում է, քանի որ մենք գալիս ենք աշխատանքի, իսկ թանգարանում մնում են միայն որմնանկարների կրկնօրինակները, որոնք էլ շատերը չեն ցանկանում տեսնել։ Նոյեմբերից մինչը գարուն գրեթե այցելություն չկա։ Որմնանկարների համար պետք է + 17 ջերմաստիճան, իսկ այդ ջերմաստիճանը կարող ենք ապահովել միայն ջեռուցմամբ, որն էլ չունենք։ Մենք հավաքում ենք օրիգինալ որմնանկարները, քանի որ կփչանան այս ցրտին։ Ամեն տարի մի քանի անգամ հավաքում ենք, ու նորից կախում։ Թանգարանում ցուցադրության մնում է միայն Մինասի հայտնի «Թորոս Ռոսլինի ծնունդը» որմնանկարը, որը չենք կարող տեղափոխել կամ տեղաշարժել»։

Ընդգծենք, որ օրեր առաջ հայտնի դարձավ, որ Մինաս Ավետիսյանի հայտնի որմնանկարներից մեկը՝ «Գիշեր»-ը ոչնչացման եզրին է։

NEWSPRESS.am-ը առաջիկայում նույնպես կանդրադառնա Մինասի հանճարեղ որմնանկարին։