Փաշինյանը հրահանգում է՝ գնալ ու պարտվել ՄԻԵԴ-ում. Քոչարյանի պաշտպանը վտանգավոր միտում է տեսնում

ՄԻԵԴ-ի գործերը և դրանց վերաբերյալ ապագայում կայացվելիք վճիռները փորձ է արվելու օգտագործել քաղաքական նպատակներով, նախանշանները կարծես զգացվում են: Այսօր հրավիրված ասուլիսին հայտարարեց Ռոբերտ Քոչարյանի փաստաբանական խմբի անդամ Հայկ Ալումյանը:

Նա հիշեցրեց, որ 2018 թ. սեպտեմբերի 19-ին Նիկոլ Փաշինյանը Փարիզում ելույթ է ունեցել, որի ժամանակ ասել է, թե իրեն մեղադրում են դատական գործերի մեջ ներգրավվելու համար:

«Թող գնան Ռոբերտ Քոչարյանի և Սերժ Սարգսյանի դեմ բոլոր գործերը պարտվեն ՄԻԵԴ-ում, և այդ գործերը հետ գան, այդ ժամանակ իրենք պատասխան տան, որ տասնյակ գործերում ապօրինի վճիռներ են կայացվել»,-հայտարարել է Փաշինյանը, ինչն էլ հիմք ընդունելով՝ Հայկ Ալումյանը նկատում է․ 

«Փաստորեն, վարչապետն ասում է, որ երբ այդ գործերը հետ գան, իրենք կարող են ասել, որ Ռոբերտ Քոչարյանի և Սերժ Սարգսյանի ժամանակ մարդկանց իրավունքները խախտվել են: Սա նշանակում է՝ ՄԻԵԴ-ի վճիռները փորձել օգտագործել քաղաքական ընդդիմախոսների դեմ պայքարում»:

Ըստ Հայկ Ալումյանի՝ Փաշինյանի հայտարարությունը քողարկված հրահանգ է Եվրոպական դատարանում Հայաստանի ներկայացուցիչներին, ովքեր կարող են ՄԻԵԴ-ում կառավարության կողմից առարկել դիմումատուների դեմ։

«Հրահանգվում է գնալ ու ՄԻԵԴ-ում գործերը պարտվել, որ վարչապետն ապացուցի, թե նախկիններն ապօրինի են գործել, սա վտանգավոր տենդենց է: Եթե լուրջ հակափաստարկներ չեն ներկայացնում, ապա եվրոպական դատարանին այլ բան չի մնա, քան փաստել, որ մարդկանց իրավունքները խախտվել են, իսկ ՄԻԵԴ-ի որոշումն էլ Հայաստանում օգտագործվելու է քաղաքական նպատակներով։ Մինչդեռ Հայաստանի ներկայացուցիչների ներկայացրած հակափաստարկները կարող են փոխել ՄԻԵԴ-ի վճիռը»,- ընդգծեց փաստաբանը՝ երևույթը համարելով վտանգավոր միտում։