Արդեն հասկացել են, որ «հեղափոխություն» կոչվածն իշխանության մարմաջ էր ընդամենը

Կառավարության ծրագրի մասին քննարկումները շարունակվում են ամբողջ թափով։ Իհարկե, Փաշինյանն ու նրա թիմը փորձեցին գոնե կառավարությունում քննարկման փուլում քննադատությունները հնարավորինս նվազեցնել՝ Օսիպյանին «Սասնա Ծռերի» գործով ցուցմունք տալու համար դատարան գործուղելով և այնտեղ էլ լարված մթնոլորտ ապահովելով, սակայն մեծ հաշվով մեկ օր միայն հասարակությունը կարողացավ «սնվել» այդ տեսարանով։ 

Ավելին՝ նույնիսկ Ալեն Սիմոնյանի և Լենա Նազարյանի ջանքերը չօգնեցին մեծ հաշվով, կապված օրհներգի փոփոխության կամ Մարտի 1-ի զոհերի պատվին հուշարձան կանգնեցնելու կեղծ օրակարգային հարցերի շրջանառության մեջ դնելու հետ։ Իսկ արդյունքում եղավ այն, որ նույնիսկ նրանք, ովքեր իշխանափոխության օրերին անձնուրաց կերպով աջակցել էին Փաշինյանին սկսել են խոսել այնպիսի տոնայնությամբ, որից կարելի է հասկանալ, որ հիասթափությունը, եթե արդեն չի սկսվել, ապա գոնե մոտ է։

Մասնավորապես, Գյումրու լրագրողների «Ասպարեզ» ակումբի նախագահ Լևոն Բարսեղյանը սոցկայքաին գրառումով անդրադարձել էր կառավարության ծրագրին։ Հիշեցնենք, որ շատ ավելի վաղ նա նախաձեռնել էր «Հայաստանի վերականգնման ճանապարհային քարտեզ» անվանումն ունեցող, ըստ էության, խորհրդատվական փաստաթղթի մշակումը։

Ակնկալելի էր, որ կառավարության ծրագրում, գոնե հպանցիկ կերպով արտացոլված կլինեն այդ փաստաթղթից դրույթներ։ Սակայն, Լևոն Բարսեղյանի գրառումից պարզվում է, որ իրենց մշակած փաստաթղթից ոչ մի բան էլ ծրագրում կառավարության՝ չի արտացոլվել, ու դա առաջացրել է նրա դժգոհությունը կամ գուցե արդեն հիասթափությունը, ով իմանա։

Բարսեղյանի գրառմանը բովանդակությամբ բավական մոտ հայտարարություն էր արել նաև Զարուհի Հովհաննիսյանը, քննադատելով կառավարության ծրագիրը և համարելով, որ անընդունելի է բաժակաճառերի ու բարեմաղթանքների շարանի նմանվող դրույթները, որոնք կարելի է ասել, ծրագրում համատարած են։ Նա ավելի հեռուն է գնացել։ Ու եթե Լևոն Բարսեղյանը միայն ֆիքսել է, որ չկան դրույթներ, ասենք, ուժային կառույցների, կուսակցությունների մասին օրենսդրության բարեփոխումների մասին որևէ խոսք, կամ անցումային արդարադատության մասին, իսկ եթե բարեփոխումների մասին խոսվում էլ է, ապա միայն շատ հպանցիկ, ապա Զարուհի Հովհաննիսյանն ուղիղ տեքստով հայտարարել է, որ բաժակաճառերի ու բարեմաղթանքների շարան հիշեցնող ծրագիրը նաև հեղափոխության արժեքներին է հակասում։ Այս դեպքում հարց է առաջանում, իսկ արդյո՞ք այդ հեղափոխություն կոչվածը միայն իշխանության գալու մարմաջ չէր։

NEWSPRESS.am