Մարտի են մեկնել միայն ՀԱԿ-ի «ծերուկները», պաշտոն են ստանում նրանց «ջահելները»․․․

Մարտի մեկյան դեպքերից հետո ՀՀ առաջին նախագահ Լևոնի Տեր-Պետրոսյանն, իհարկե, կրկին փորձում էր ակտիվ քաղաքականություն մտնել։ Նա «իշխանափոխության» մի քանի անհաջող փորձ արեց․․․

Ըստ էության, թվում էր՝ ամեն ինչ կար, որպեսզի Լևոն Տեր-Պետրոսյանը կարողանա վերդառնալ․ հանրահավաքներ, բազմության միջից դուրս եկող բռունցքներ, «Լե-վոն նա-խա-գահ․․․» վանկարկումներ, ոգևորված ու հավատով լի՝ Բաղրամյան 26-ը գրավել ցանկացող ժողովուրդ․․․ բայց ամեն անգամ, երբ ժողովուրդը «հիմա, հիմա․․․» գոռալով ուզում էր գնալ Բաղրամյան 26-ը գրավելու, Տեր-Պետրոսյանը կանխում էր առաջխաղացումը, թե՝ դեռ ժամանակը չէ ու «բարի գիշեր» մաղթելով՝ բոլորին տուն ուղարկում։ Նրա «բարի գիշեր»-ներն անգամ հիթային երգ էին դարձել։ Ինչևէ․․․

Արդյոք նա ա՞յս ժամանակի մասին էր խոսում, թե՞ ոչ, չենք մեկնաբանում։ Փաստերը ցույց են տալիս, որ այսօր մեկը մյուսի հետևից պաշտոններ են ստանում հենց Լևոն Տեր-Պետրոսյանի կադրերը։

Իհարկե, կարելի է մտածել նաև, թե տաշած քարերը գետնին չեն մնում, սակայն անհասկանալի զուգադիպությամբ, այդ տաշածները, պարզվում է, միայն Տեր-Պետրոսյանի թիմակիցներն են։

Չթվարկենք նրանց անունները, պարզապես նկատենք, որ այժմ էլ կառավարությունում հաստիք է զբաղեցրել Թադևոսյանի փեսան։ Իսկ ավելի կոնկրետ՝ Զոյա Թադևոսյանի փեսան ԿԳ նորանշանակ փոխնախարար Գրիշա Թամրազյանն է, ով նաև Կենտրոնական ընտրական հանձնաժողովում ժամանակին ՀԱԿ-ի ներկայացուցիչն էր:

Զոյա Թադևոսյանը ֆեյսբուքյան իր էջում նույնիսկ շնորհավորել է Գրիշային նշանակման առիթով։

Մամուլում շրջանառվող տեղեկատվության համաձայն էլ, Զոյա Թադևոսյանի աղջկան՝ Տնտեսագիտական համալսարանի դասախոս Դիանա Գրիգորյանին էլ սպասում է պրոռեկտորի պաշտոնը։

Հիշեցման կարգով նկատենք, որ Զոյա Թադևոսյանն անցյալ տարի, իր ասուլիսներից մեկում հայտարարել էր, թե «Արցախի ազատագրված տարածքները գրավյալ տարածքներ են և դրանք ճիշտ է հանձնել՝ հիմնախնդիրը լուծելու համար»։ Նրա այս հայտարարությունը բավականին մեծ աղմուկ բարձրացրեց, որից հետո նա իր «ափսոսանքը» հայտնեց, թե՝ «ներեցեք անզգույշ խոսքերիս համար»։

Թեև այս տեսակետը Լևոն Տեր-Պետրոսյանն ինքը մեկ անգամ չէ, որ առաջ է քաշել, սակայն հարկ է նկատել, որ դեպքից հետո, տևական ժամանակ, Զոյա Թադևոսյանը լուռ էր։

Հնարավոր է, որ զգուշավորություն ցուցաբերելու առումով այդ շրջանում նրան զրկել էին խոսելու հնարավորությունից, հատկապես որ Նիկոլ Փաշինյանի շարժման նոր շրջանն էր և այն դեռևս ավարտին չէր հասել։

Համենայնդեպս, այդ շրջանում NEWSPRESS.am-ը ևս փորձեց հարցազրույց կազմակերպել հենց Թադևոսյանի նախընտրած տարբերակով (տեսանյութ, ձայնագրություն կամ ասուլիս), սակայն վերջինս մեկ նախադասությամբ պատասխանեց․ «Ես այլևս չեմ խոսելու»․․․

Նա, իհարկե, խոսեց, բայց արդեն խորհրդարանական ընտրություններից հետո, երբ արդեն «իրավիճակ էր փոխվել»․․․

Մի խոսքով՝ հիմա, երբ Զոյա Թադևոսյանի յուրայիններն աստիճանաբար իրենց «ոտքին տեղ են անում» ու պաշտոններ զբաղեցնում, ինչո՞ւ Զոյա Թադևոսյանն էլ չփորձի անել դա, ինչո՞վ է պակաս ՀԱԿ-ի մյուս անդամներից։ Ավելին՝ նա ՀԱԿ-ի հետ անցած «մարտական ուղի» ունի, ու որպես տարեց մարտիկ՝ իրավունք ունի իր «ջահելներին» տեղավորելու։

Ասել է թե՝ մարտի են մեկնել ՀԱԿ-ի միայն «ծերուկները», ու պաշտոն են ստանում նրանց «ջահելները»․․․

Ա․Սահակյան