«Հանգիստ նստե՛ք տեղներդ»․ Կոտայքի մարզպետն իներցիայով դատի է տալիս իրեն «սևացնողներին»

Կոտայքի մարզպետ Ռոմանոս Պետրոսյանը դիմել է դատարան՝ ֆեյսբուքյան օգտատիրոջը դատի տալու և նրանից դրամական փոխհատուցում պահանջելու համար։

Մարզպետը, մեջբերելով Սահմանադրության համապատասխան դրույթները, նշել է, թե «իր պատիվը, արժանապատվությունն ու գործարար համբավն արատավորել են՝ վիրավորանքի ու զրպարտության միջոցով»․․․

Պետրոսյանը նկատել է նաև, որ պատրաստ է լսել իր հասցեին ցանկացած առողջ քննադատություն, սակայն իր արած աշխատանքը փնովելը, «սևացնելը» չի ների։ Նա ուզում է իր անունն «արարտավորողից» բռնագանձել կլորիկ գումար և վստահեցնում է, որ այն ուղղելու է մարզային ենթակայության դպրոցներից մեկում որևէ հիմնախդրի լուծմանը։

Թե կոնկրետ նրա այդ որ արած գործն է արատավորել ֆեյսբուքյան օգտատերը՝ մարզպետը չի մանրամասնում, ինչպես նաև չի նշում, թե այդ գումարը ո՞ր դպրոցի համար ու կոնկրետ ո՞ր հիմնախնդրի լուծմանն է ուղղելու։

Քանի որ մարզպետը սիրում է փաստերով խոսել, ուրեմն արձանագրենք, որ, փաստորեն, նա հաստատում է, որ մարզում կան խնդիրներ, որոնք լուծելու համար գումարներ են հարկավոր։

Ափսոս, որ այդ խնդիրների մասին Նոր տարվա նախաշեմին նա մոռացել էր․․․ սրա փաստն էլ այն է, որ ՀՀԿ-ից «իներցիայով» նոր իշխանությանը փոխանցված պարգևավճարները, փաստորեն, մարզպետն ուղղեց ո՛չ թե այդ խնդիրների լուծմանը, այլ իր գրպանը։

Փաստ է նաև, որ այս ամենն առաջին հերթին դուր չէր գա խնդիրներ ունեցող կոտայքցիներին, ովքեր նրա գործողությունների անմիջական կրողն են և ովքեր իրենց բողոքի ձայնն են բարձրացրել ու արժանացել մարզպետի «ցասմանը»։

Եթե ժողովուրդը բողոքում է ու վիրավորում, նշանակում է՝ ինչ-որ բան թերի է կատարվում ու մարզպետի աշխատանքը նրան չի գոհացնում։ Եվ փոխանակ պարզելու, հասկանալու, թե կոնկրետ ինչ խնդիրներ ունի իր մարզի բնակիչը (թեև նա հազիվ թե չիմանա խնդիրների մասին), մարզպետն իրեն քննադատողներին պատասխանատվության է կանչում, մոտավորապես՝ «դե գրպանից փող տալը հեշտ է՝ դուք խնդիրները լուծեք ձեր գրպանից» սկզբունքով, և դրամական փոխհատուցում է պահանջում։

Այստեղ մարզպետին ո՛չ թե փնովել ու զրպարտել, այլ գովել է հարկավոր, քանի որ նա գտել է բյուջեն լցնելու և մարզի խնդիրները լուծելու կարճ ճանապարհը։ Իր կողմից ևս մի քանի թերացումներ ու ժողովրդի կողմից բացասական արձագանքներ և մարզի առաջխաղացումներն ապահովված են։

Ընդհանրապես, այս իշխանության անդամները պարզապես այն աստիճան են իներցիայի տակ ընկել, որ նախորդների նման էլ իրենց չարած գործերն ուզում են ժողովրդի վզին փաթաթել։ 

Ամեն ինչ շատ ավելի փաստարկային ու ճիշտ կլիներ, եթե մարզպետը նույն ոգեշնչությամբ ու ոգևորությամբ գնար իր թերացումների մասին բարձրաձայնողների հետքերով ո՛չ թե նրանցից գումար բռնագանձելու, այլ հասկանալու համար, թե ինչն է անհանգստացնում մարդկանց ու ինչո՞ւ նրանք այդպես էլ չեն կարողանում հաշտվել իր ստացած պարգևավճարների մտքի հետ։

Հոգեբանական թեզ է նաև այն, որ մարդիկ շատ հաճախ գիտակցում են իրենց բացասական կողմերն ու իրենք իրենց խոստովանում իրենց իսկ թերացումները, բայց նրանց երբեք դուր չի գալիս, երբ այդ մասին իրենց ասում է դիմացինը․ դա նրանց ագրեսիվացնում է ու մղում դիմացինին պատասխանատվության բերելու գործողություններին։ Դա, ըստ երևույթին, եղավ նաև այս դեպքում․․․

Այլ կերպ ասած՝ ոչ ոք իրավունք չունի ասելու, թե թագավորը մերկ է․․․

Ու դա է պատճառը, որ գործ անելու փոխարեն, մարզպետը, ինչպես և վարչապետ Նիկոլ Փաշինյանը, մատ է թափ տալիս ժողովրդի վրա ու բղավում, թե «հանգիստ նստե՛ք տեղներդ», թե չէ՝ «դատարանի ծակը կկոխեմ»․․․

NEWSPRESS.am