Փաշինյանը Բոլթոնի թվիթները կարդալու ժամանակ չունի․ անտեղյակ է կարևոր հարցերից

Նիկոլ Փաշինյանն, ով Հայաստանի ղեկավարն է, իսկ Հայաստանն իր հերթին Արցախի անվտանգության երաշխավորը, պարզվում է՝ չի սիրում կարդալ։

Երեկ նախագահական նստավայրում կառավարության անդամներին երդմնակալության արարողությունից հետո, Նիկոլ Փաշինյանը պատասխանեց լրագրողների հարցերին։

Խոսեց Ալիևի հետ Դավոսում կայացած հանդիպումից, ասաց, որ դրանք բանակցություններ չեն ու վստահեցրեց՝ Ալիևի հետ Արցախի հարց չի քննարկվել։
Փաշինյանը նաև պնդեց, որ Արցախի հարցը չի քննարկել Ալիևի հանդիպումից անմիջապես հետո ԱՄՆ նախագահի ազգային անվտանգության հարցերով խորհրդական Ջոն Բոլթոնի հետ։

Պնդեց, որ Ղարաբաղի անունն անգամ այդ հեռախոսազրույցի ընթացքում չի քննարկվել՝ հետո էլ արդարացավ, թե կոռեկտ չէ նաև, որ ինքն ասի, թե Ալիևն իրեն ինչ է ասել, ինքն ինչ է պատասխանել։

Փաշինյան-լրագրողներ հարցուպատասխանը գուցեև այսպես էլ ավարտվեր և դրա վրա կենտրոնանալու խնդիր չլիներ, եթե այդ ընթացքում Փաշինյանը թույլ չտար մի խայտառակ վրիպում։

Լրագրողի հիշեցմանը, որ նույն Բոլթոնն իր հետ հեռախոսազրույցից անմիջապես հետո խոսել է նաև Ադրբեջանի նախագահ Իլհամ Ալիևի հետ և այդ խոսակցության ընթացքում խոսել են Արցախից, Փաշինյանը զարմացած պատասխանեց․ «Տեղյակ չեմ»։

Իսկ երբ նրան ասացին, որ այդ մասին Բոլթոնը թվիթերյան գրառում է նաև արել, Փաշինյանը կրկին ասաց, որ տեղյակ չէ և չի կարող որևէ բան ասել։

Փաստորեն, Արցախի խնդրի վերաբերյալ խոսակցությունն են ունեցել ԱՄՆ նախագահի ազգային անվտանգության հարցերով խորհրդական Ջոն Բոլթոնն ու Հայաստանի ու  Արցախի հետ հակամարտող երկրի ղեկավար Ալիևը, իսկ մեր վարչապետը դրանից տեղյակ չէ․ Բոլթոնի այդ գրառումը չի կարդացել, իսկ փոխարենը լրագրողներին խորհուրդ է տալիս կարդալ իր ֆեյսբուքյան գրառումը՝ հասկանալու համար իր ու Ալիևի դավոսյան հանդիպման մանրամասները։

Ասում է, որ պրոֆեսիոնալ լրագրողը կարող էր իր գրառումը կարդալ ու այլևս իրենց հարցեր չտալ՝ առանց գիտակցելու, որ լրագրողին կարդալ խորհուրդ տալուց առաջ, լավ կլիներ ինքն այդ բանն աներ՝ կարդար Բոլթոնի գրառումը․․․․

NEWSPRESS.am