Բժիշկ Ստեփանյանին առաջադրվող մեղադրանքը շինծու է, կալանավորումը՝ անհիմն. Հարություն Հարությունյան

Հարություն Հարությունյանն իր ֆեյսբուքյան էջում հորդորել էր աջակցել սիրված բժիշկ Գևորգ Ստեփանյանին, ով այս պահին կալանավորված է և գտնվում է ռուսական բանտերից մեկում։

Հարություն Հարությունյանի համոզմամբ՝ Ստեփանյանին անհիմն են պահում կալանավայրում: Հասկանալու համար, թե ինչի մասին է խոսքը NEWSPRESS.am-ը կապ հաստատեց Հարություն Հարությունյանի հետ:

Նա պատմեց, որ 2018-ի նոյեմբերին Գևորգ Խորենի Ստեփանյանը Մոսկվայի կլինիկաներից մեկում հայազգի Կարոլինային կատարել է քթի պլաստիկ վիրահատություն, որն ավարտվել է բարեհաջող: Վիրահատությունից երեք օր անց բժիշկ Ստեփանյանն անձամբ հանել է տամպոնները և վերադարձել Հայաստան։

Քանի որ աղջիկը ֆիզիկական թուլություն և այտուց է ունեցել՝ կլինիկայի գլխավոր բժիշկ Գյուլնարա Շախը Կորոլինային խորհուրդ է տվել մնալ հիվանդանոցում։

«Մի քանի օր հետո Կարոլինան չի կարողանում քնել, ինչի համար Կլինիկայի անասթեզիոլոգը՝ Լև Խիտրինը, նրան նշանակում է «Ֆինազեպամ» տեսակի դեղահաբ: Ոչ ոք չգիտի «Ֆինազեպամ»-ից բացի ինչ այլ դեղորայք է ընդունել Կարոլինան, բայց արդյունքում վերջինիս մոտ առաջանում է ալերգիկ ռեակցիա, որին հաջորդում է «Կվինկեի այտուցը»»,- մեզ հետ զրույցում պատմում է Հարություն Հարությունյան

Կարոլինան կորցնում է գիտակցությունը և միայն 10 օր հետո նրա գիտակցությունը վերականգնվում է: Չնայած աղջիկը հայտարարում է, որ Գևորգ Ստեփանյանը ոչ մի մեղք չունի կատարվածի մեջ և իր գործը կատարել է ամենայն պատասխանատվությամբ, սակայն Գևորգ Ստեփանյանին կալանավորում են, իսկ կլինիկայի ղեկավար Գյուլնարա Շախին և անեսթեզիոլոգին նշանակվում է տնային կալանք։

«Դատարանը պատճառաբանում է, թե բժիշկ Ստեփանյանը չունի ՌԴ գրանցում և սեփականություն, այդ իսկ պատճառով պետք է նա մնա կալանավորված։ Ակնհայտ է, որ այստեղ կա ինչ-որ շինծու և անհիմն մեղադրանք, և կան շահագրգիռ անձինք, ովքեր ցանկանում են Գևորգին պահել կալանավորված։ Ցավալի է, երբ կիրթ, մեծահոգի և պարկեշտ բժիշկ Ստեփանյանը պետք է կալանքի մեջ լինի Մոսկվայի ամենադաժան՝ «Բուտիրովյան» բանտում։

Բազմիցս բախտ եմ ունեցել շփվել դոկտոր Ստեփանյանի հետ։ Նրա մասին կարող եմ ասել միայն դրականը։ Նա ընկերասեր մարդ է և լավ վիրաբույժ»։