Մարտի 1-ի գործի քննությունը սխալ տեղ է տանում․ զոհերի հարազատներին պետք չէ մոլորության մեջ պահել․ Արմեն Ռուստամյան

ՄԻԵԴ-ում արդեն իսկ որոշակի որոշումներ են ընդունվում, և չի բացառվում, որ 2008-ի Մարտի 1-ի հարցի շուրջ ստեղծվի մի վիճակ, որից ՀՀ հեղինակությունը՝ որպես իրավական պետություն, կարող է տուժել։

Այս մասին լրագրողների հետ զրույցում ասաց ՀՅԴ բյուրոյի նախագահ Արմեն Ռուստամյանը։

Նա նկատում է, որ ՀՅԴ-ն ՀՀ երկրորդ նախագահ Ռոբերտ Քոչարյանին առաջադրված մեղադրանքում խնդիր է տեսնում։

«Մենք Ռոբերտ Քոչարյանին՝ որպես անձ, չենք պաշտպանել, այլ պաշտպանել ենք արդարադատությունը»,- ասաց Արմեն Ռուստամյանը՝ հավելելով, որ «Մարտի 1»-ի գործով մեղադրյալների ներգրավման ձևն իրենց մտահոգում է։

«Արդարադատությունը չպետք է ընտրովի լինի, արդարադատությունը չպետք է ստեղծի հաշվեհարդարի տպավորություն, որ դա վենդետայի նպատակ է հետապնդում։ Արդարադատությունն առաջին հերթին պետք է վերաբերի նրան, որ բացահայտվեն «Մարտի 1»-ի 10 զոհերի մեղավորները։ Այս ձևով, որով դրվել է մեղադրանքը, փորձ է արվում 2-րդ պլան մղել գլխավոր նպատակը»,- նկատում է ՀՅԴ բյուրոյի նախագահը։

Նրա դիտարկմամբ՝ այսօր դրվում է մեղադրանք, որը դեռևս ապացուցվելու անհրաժեշտություն ունի։

«Այսինքն՝ դեռ պետք է ապացուցվի՝ սահմանադրական կարգի տապալում եղե՞լ է, թե՞ ոչ, որ հետո նոր 10 զոհերի մեղավորը պարզվի»,- ասաց նա։

ՀՅԴ-ն հակված չէ համաձայնել առաջ քաշած այն տեսակետի հետ, թե 2 կողմերից միայն մեկն է մեղավոր։ Նրանք համոզված են՝ 2 կողմում էլ կան մեղավորներ։

Արմեն Ռուստամյանի գնահատմամբ՝ «Մարտի 1»-ի գործի քննության մեջ քաղաքական դրդապատճառներն ակնհայտ են։

«Այն ժամանակ, երբ «Մարտի 1»-ի գործով 7 հոգու դատ կար, մենք ամեն ինչ արեցինք, որ հոդվածը, որի տակ ամեն ինչ մտնում էր, տարանջատվեր, որի պատճառով էլ համաներում եղավ, սակայն սա ոչ մեկը չի հիշում»,- շարունակեց Ռուստամյանը։

Նրա դիտարկմամբ՝ սահմանադրական կարգի տապալման մեղադրանքը գործի քննությունը սխալ ուղղությամբ է տանելու և չի բացահայտվելու, թե կոնկրետ ով է կրակել ու այդ կրակողն ումից է հրահանգ ստացել։

Արմեն Ռուստամյանն այս համատեքստում հորդորում է 10 զոհերի հարազատներին մոլորության մեջ չգցել, քանի որ գործի քննության նման ընթացքը չի բացահայտի զոհերի հետևում կանգնածներին։