7 շրջան՝ Ադրբեջանին. Դուգինն ասում է, Փաշինյանին ընդունելու ժամանակ չգտած Պուտինը, կարծես թե՝ հաստատում

Մինչ Դավոսում Ադրբեջանի նախագահ Ալիևի հետ կայացած ժամուկեսանոց հանդիպման մասին ՀՀ վարչապետ Նիկոլ Փաշինյանը համառորեն լռում է՝ չբացելով այդ հանդիպման մանրամաները, Երևանի և Բաքվի միջև պայմանավորվածությունների մասին վերլուծությունները հաջորդում են մեկը մյուսին:

Տարասովից հետո, այս անգամ այդ հանդիպումից չակերտներ է բացել
Կրեմլի «խոսնակ» Ալեքսանդր Դուգինը:

Ըստ նրա՝ Ռուսաստանի և Ադրբեջանի գործողությունների միջև կա որոշակի կապ և հետևողականություն։ Ռուսաստանը ոչ թե չեզոք դիտորդ է, այլ եռանդուն մասնակից Ղարաբաղյան հակամարտության կարգավորման գործում։

«Բաքվի և Մոսկվայի միջև կա կատարյալ փոխհասկացողություն հինգ շրջանների հանձնման հարցում, որին հաջորդելու է ևս երկու շրջանի հանձնում, որոնք գտնվում են Ղարաբաղի շուրջ։ Նման համաձայնություն կայացել է Հայաստանի նախկին ղեկավարության օրոք»,-ասել է նա։

Ինչպես Ալեքսանդր Դուգինի խոսքերն է վկայաբերում hraparak.am-ը, փորձագետը նաև նշել է, որ փոփոխված պարամետր է դարձել միայն Փաշինյանի դիրքորոշումը։

«Նա իշխանության եկել է հակառուսական, ազգայնական, լիբերալ և արևմտամետ ուժերի տրամադրությունների ալիքի շնորհիվ, սակայն ինքն էլ է հասկանում, որ նախորդ իշխանությունների կողմից ձեռք բերած համաձայնությունների հետագա սաբոտաժը կարող է հենց իրեն վնասել»։ 

Ալեքսանդր Դուգինը չի բացառել նաև, որ առաջիկայում կլինի պայմանավորվածություն հինգ շրջանների և ևս երկու շրջանի հանձնման շուրջ՝ Ադրբեջանին, որից հետո կսկսվի նոր փուլը:

Իսկ գուցե հենց այս քողարկված պայմանավորվածություններն են պատճառը, որ Պուտինը ժամանակ չգտավ հանդիպել ԵԱՏՄ-ում Հայաստանի նախագահությունը ստանձնելու առթիվ Մոսկվա մեկնած Փաշինյանին:

Փաշինյան-Ալիև հանդիպման պատմությունն այնքան մութ է, որ առիթ է տալիս տարբեր փորձագիտական շրջանակների անել Հայաստանի համար բացարձակ ոչ ձեռնտու վերլուծություններ, որոնք, սակայն, իշխանության կողմից որևէ լրջմիտ բացատրության, հերքման չեն ենթարկվել:

NEWSPRESS.am