ՀՅԴ-Փաշինյան «սիրախաղի» տողատակը

Գիտությունների ազգային ակադեմիայի շենքի աստիճաններին նսեմացուցիչ կերպով Կառավարության մաս կազմող դաշնակցական նախարարներին աշխատանքից ազատելուց հետո Նիկոլ Փաշինյանը նոր «խաղ» է սկսել «Հայ հեղափոխական դաշնակցության» հետ:

Նախ, Փաշինյանն ուշացումով՝ հունվարի 16-ին Արցախում գումարված ՀՅԴ 33-րդ Ընդհանուր ժողովի աշխատանքների 5-րդ օրը, անսպասելիորեն Դաշնակցությանը ողջույնի ուղերձ հղեց, այնուհետև իր և Հայաստանի նորընտիր խորհրդարանի մեծամասնության անունից հայտարարեց, որ պատրաստ է համագործակցության ՀՅԴ-ի հետ և բաց է լինելու հնչեցրած առաջարկությունների և քննադատության համար:

Ակտիվ քաղաքականությունից ՀՅԴ-ին լուսանցքում թողնելուց հետո, սա Նիկոլ Փաշինյանի՝ համագործակցության առաջին քայլն էր, որի տակ թաքնված ենթատեքստը դեռ մնում է անհայտ:

Հունվարի 27-ին էլ՝ Դավոսից վերադառնալուց հետո, Փաշինյանը շտապեց ընդունել «Հայ հեղափոխական դաշնակցության» Բյուրոյի նորընտիր ներկայացուցիչ Հակոբ Տեր-Խաչատուրյանին և Բյուրոյի անդամներին:

Դաշնակցականների հետ հանդիպման ժամանակ, մոռանալով, թե ամիսներ առաջ ինչպես փողոցում կառավարությունն ազատեց ՀՅԴ-ական գործիչներից, Նիկոլ Փաշինյանն ասել է.

«Մեր կառավարությունը միտված է և հակված է լայն ու արդյունավետ համագործակցություն ունենալ Դաշնակցության հետ, որովհետև հասկանալի է, որ մենք շատ հարցերում նույն տեսակետը չունենք, բայց պակաս չեն հարցերը, որոնց վերաբերյալ առնվազն մեր ընկալման վեկտորները համընկնում են: Այնպես որ՝ ուրախ եմ այս առիթի համար, նաև համոզված եմ, որ ընթացիկ հարցեր քննարկելու հնարավորություն կունենանք: Կրկին անգամ շնորհավորում եմ անձամբ Ձեզ և Բյուրոյի մյուս անդամներին ընտրության կապակցությամբ»:

Թե ինչ նպատակ է հետապնդում Նիկոլ Փաշինյանն ու ինչ պայմանավորվածություններ են հաջորդելու այս «սիրախաղին», կտեսնենք շուտով՝ կարճ ժամանակ անց, միայն հավելենք, որ ՀՅԴ-Փաշինյան «մերձեցման» համար գուցե առանցքային դերակատարում ունի Արցախը՝ մի խնդիր, որից իշխանության գլուխ դառնալուց 8 ամիս անց էլ Նիկոլ Փաշինյանը շարունակում է գլուխ չհանել:

Գուցե ՀՀ-Արցախ ռազմաքաղաքական դաշինքի մասին համաձայնագիրն է, որը եկել է միավորելու ամիսներ առաջ իրար որևէ կերպ չհանդուրժող մարդկանց...

NEWSPRESS.am