Եկել եք իշխանության, որ քարտուղարուհինե՞ր խաղացնեք

Ամոթ չէ՞, պարոնա՛յք, դուք մա՞րդ չեք, զգացմունքներ չունե՞ք:

Սովածների ու չտեսների հերթական խումբն է եկել մեր երկիրը ղեկավարելու: Միլիոնների հասնող պարգևատրումները խոսում են այն մասին, որ նորերն իրենց իշխանության բերած ժողովրդի վրա պարզապես թքած ունեն, նրանց չի հետաքրքրում մեր երկրի ծայրահեղ աղքատության մեջ ապրող բնակչության ցուցանիշը, նրանց չի հետաքրքրում մեր բանակի սպառազինության հարցը, նրանց միայն հետաքրքրում է իրենց միլիոններն ու քարտուղարուհիներին «լավ նայելը»:

Քարտուղարուհիների այս իշխանությունն օր օրի պատուհաս է դառնում մեր գլխին, ձեր քարտուղարուհիներին միլիոններով պարգևավճար բաշխելու համա՞ր ժողովուրդը դուրս եկավ ու հեղափոխություն արեց: Եկել եք իշխանության, որ քարտուղարուհինե՞ր խաղացնեք:

Դավիթ Անանյան, ի՞նչ է նշանակում` քարտուղարուհին քարտուղարուհի ունի, դուք դա նորմա՞լ եք համարում, հետո էլ ձեր քաղաքական թիմը խոսում է պետական համակարգի ուռճացվածության մասին: Ձեր պարգևավճարներով Մշակույթի նախարարություն կարող էիք պահել:

ՊԵԿ- ի պարգևատրումների լուրը դեռ չմարսած՝ հիմա էլ մամուլը գրեց Ֆինանսների նախարարության պարգևատրումների մասին:

Կրկին միլիոններ, կրկին աստղաբաշխական թվեր, որ մեր բյուջեից գնաց Դավիթ Անանյանի ու Ատոմ Ջանջուղազյանի, խորհրդականների, քարտուղարուհիների ու տեղակալների գրպանները:

Ամոթ չէ՞, պարոնայք, ո՞նց եք նայելու անտուն ու կիսաքաղց երեխաների աչքերին, ո՞նց եք գիշերը գլուխներդ հանգիստ բարձին դնում, դուք մա՞րդ չեք, զգացմունքներ չունե՞ք: Ձեր ստացած պարգևավճարներով կարող էիք Գյումրիում դեռևս դոմիկներում ապրող բնակիչներին բնակարաններով ապահովել, սնունդ ու հագուստ հասցնել նրանց։

Թե՞ մտածում եք, որ ձեր քարտուղարուհիների ու նրանց քարտուղարուհիների բրենդային վերջին հավաքածուներն ավելի կարևոր են, քան ձեզ իշխանության բերած ու ձեզ դեռ հավատացող մի ողջ ժողովուրդ․․․

Վերջում կցենք նաև Medialab-ի դիպուկ ծաղրանկարը

Արիանա Հովսեփյան

NEWSPRESS.am-ի հիմնադիր-տնօրեն