Նախկինների ձեռագրով. Հայկոն ստում է Նիկոլին ձայն տված երևանցիներին (լուսանկար)

Երեկ հայտնի դարձավ, որ մայրաքաղաքի ձնամաքրման աշխատանքները պատշաճ կազմակերպելու համար Երևանի քաղաքապետարանը 9 նոր հատուկ տեխնիկա է ձեռք բերել:

Երևանի քաղաքապետարանը տեղեկացրեց, որ մրցույթում հաղթող է ճանաչվել ռուսաստանյան «ԿամԱԶ» ընկերությունը:

Նոր տեխնիկան միաժամանակ մի քանի գործողություն է իրականացնում:

Ձնամաքրումից բացի, դրանք նաև աղ ու ավազ ցանելու համար են նախատեսված: Տարվա տաք եղանակներին էլ կարող են ծառայել որպես ջրցան մեքենաներ՝ ապահովելով երևանյան փողոցների մաքրությունը:

Մեքենաներն ունեն ժամանակակից «Եվրո 5» չափորոշիչի շարժիչներ, որոնք կրճատում են վնասակար արտանետումները: Սա հատված է քաղաքապետարանի տարածած լուսավոր հաղորդագրությունից։

Միայն հաղորդագրությամբ այդ մասին իմաց տալով էլ կարգին քաղաքապետը շտապեց նկարվել մեքենաներից մեկի ղեկին՝ գործ անող քաղաքապետի կերպարի ստեղծելով։

Քաղաքապետարանի տարածած հայտարարությունից ժամեր անց Երևանի ավագանու «Լույս» խմբակցության ղեկավար Դավիթ Խաժակյանը պատռեց քաղաքապետարանի դիմակը։

Խաժակյանը հայտնեց, որ ռուսաստանյան «ԿամԱԶ» ընկերությունից 9 մեքենաները ձեռք են բերվել առանց մրցույթի՝ մեկ անձից գնման ընթացակարգով:

«Քաղաքապետարանի պաշտոնական կայքով հաղորդագրություն տարածվեց այն մասին, որ համայնքը դառնում է քաղաքի սանմաքրմամբ զբաղվող օպերատոր։ Դեռևս առանց անդրադառնալու այդ որոշման արդյունավետությանը և իրավաչափությանը արձանագրում ենք, որ հաղորդագրության մեջ նշված է, թե նոր մեքենաները ձեռք են բերվել մրցույթով:

Սույնով հայտարարում ենք, որ ռուսաստանյան «ԿամԱԶ» ընկերությունից 9 մեքենաները ձեռք են բերվել առանց մրցույթի՝ մեկ անձից գնման ընթացակարգով:

Մեկ անձից գնման ընթացակարգը ևս տեղի է ունեցել խախտումներով, սակայն այս պահին առաջնային հանգամանքն այն է, որ 9 մեքենաների 414․000․000 դրամի՝ առանց մրցույթի գնումն անընդունելի է և սկսել է կրել պարբերական բնույթ»,-գրել է Խաժակյանը՝ գրառմանը կից հրապարակելով ասածն ապացուցող փաստաթղթեր։

Ստացվում է՝ Հայկ Մարությանը շատ արագ է սերտել նախորդների դասերը և գործում է նրանց օրինակով․ չէ՞ որ հենց նախորդ իշխանությունն էր հայտնի առանց մրցույթների գնումներ անցկացնելու վարպետությամբ։

Փաստորեն, Հայկ Մարությանը շատ արագ քայլերով է գնում նախկին իշխանության հետևից՝ ամեն վայրկյան ստելով Նիկոլ Փաշինյանին ձայն տված երևանցիներին։

Հետևաբար, Երևանի գլխավոր տոնածառի, տոնական միջոցառումների վրա ծախսած միլիոններից հետո, ձնամաքրման ավտոմեքենաները կարող են դառնալ Հայկ Մարությանի հրաժարականի դիմումի հիմնական մեխը․ ի դեպ, օր օրի այդ մեխերն ավելի են շատանում։

Արիանա Հովսեփյան