Դավիթ Անանյանը՝ կարկտաբեր ամպերի տակ

ՊԵԿ նախագահ Դավիթ Անանյանի գլխին սև ամպեր են կուտակվել, իսկ այս վերջին շրջանում դրանք վերածվում են կարկտաբեր ամպերի։ Նրա հունվարյան այս խաղաղ առավոտը մթագնվեց փաստաբան Տիգրան Հայրապետյանի ասուլիսով, որի ընթացքում փաստաբանը բացահայտեց ՊԵԿ նախագահի գործելաոճն ու այդ համակարգում տիրող իրավիճակը։

Ըստ պաշտպանի՝ ՊԵԿ նախագահը զբաղված է հակապետական գործունեությամբ, որովհետև համակարգից հեռացնում է այն մարդկանց, ովքեր կոռուպցիոն բացահայտումներ են անում, կամ, ինչպես Հայրապետյանն է նշում՝ սև սխեմաներ են բացահայտում։

Այսօր հրավիրված ասուլիսի ժամանակ փաստաբանը մի շարք փաստեր նշեց, որոնցից կարելի է ենթադրել, որ Դավիթ Անանյանը բավականին երկար ժամանակ փորել է Վալերի Օսիպյանի քավոր, ՊԵԿ օպերատիվ հետախուզության վարչության պետ Կարեն Կարապետյանի ոտքի տակը, իսկ ավելի ուշ, այլ տարբերակ չունենալով, ՀՔԾ-ի միջոցով նրա նկատմամբ քրգործ է հարուցել տվել, ինչը, սակայն, ամիսներ անց կարճվել է՝ Կարեն Կարապետյանի հանցակազմի բացակայության հիմքով։

Որպեսզի Կարեն Կարապետյանը ՊԵԿ համակարգ չվերդառնա արդեն արդարացված և ապացուցված մաքուր ձեռքերով, ըստ Հայրապետյանի, Դավիթ Անանյանը փոխել է ՊԵԿ պաշտոնյաների աշխատանքի համար սահմանված չափորոշիչները, որից հետո Կարապետյանը չի կարողացել վերադառնալ համակարգ։

Իր պաշտոնավարման առաջին իսկ օրվանից Կարեն Կարապետյանին օպերատիվ հետախուզության վարչության պետ նշանակելով և մշտապես մամուլի քննադատության թիրախում հայտնվելուց հետո, հավանաբար, Դավիթ Անանյանը որոշել է իսպառ ազատվել այդ գլխացավանքից և որոշել փակել ՊԵԿ դռները Կարապետյանի առաջ, ինչից հետո էլ Կարապետյանը դիմել է վարչապետ Նիկոլ Փաշինյանին, ով Դավիթ Անանյանից պահանջել է հաշվետու լինել ամեն մի քայլի համար։

Թե որքանով կկարողանա Դավիթ Անանյանն արածների տակից դուրս գալ, կերևա մոտ ապագայում, իսկ մինչ այդ՝ փաստենք, որ Կարեն Կարապետյան-Դավիթ Անանյան հակամարտությունը հասել է Նիկոլ Փաշինյանին։

Չի բացառվում, որ ՊԵԿ նախագահ Դավիթ Անանյանը սկանդալի կիզակետում հայտնվի նաև այսօր տարածված մեկ հաղորդագրության պատճառով։

Մինչ կայքերը մեկը մեկին հերթ չտալով տարածում էին ծառայության հաղորդագրությունն այն մասին, որ «Նաիրի Ինշուրանս» ապահովագրական ՍՊԸ-ն հարկ չի վճարել և պետությանը պատճառել է մոտ 200 մլն դրամի վնաս, «Նաիրի Ինշուրանս» ապահովագրական ՍՊԸ-ն տարածեց իր պատասխան հաղոդագրությունը՝ պնդելով, որ ՊԵԿ-ից իրենց չեն այցելել։

Այս պարագայում հարց է առաջանում, թե ինչպես են բացահայտել 200 մլն դրամի չվճարված հարկը․ արդյոք դա իրակա՞ն թիվ է, թե՞ քաղաքական վենդետայի շարունակություն։

Հիշեցնենք, որ ընկերությունը պատկանում է ՀՀ երկրորդ նախագահ Ռոբերտ Քոչարյանի որդուն՝ Լևոն Քոչարյանին։

Արդյոք Լևոն Քոչարյանի հարցն էլ կհասնի «դիվանբաշուն»՝ Նիկոլ Փաշինյանին, թե՞ Դավիթ Անանյանի շուրջ ստեղծված թնջուկը կլուծվի նրա հեռացմամբ՝ ցույց կտա ժամանակը։

NEWSPRESS.am