Սեփական շահի մասին մտածող, աղքատին մոռացող և խոստումներից հրաժարված պաշտոնյաներ

Երբ հեղափոխությամբ իշխանության եկածներին համեմատում ենք նախորդների հետ, նեղսրտում են, ասում են թե՝ եզրեր չկան, սակայն ակնհայտ է, որ ինչքան նորեկները պաշտոնավարեն, այնքան բյուջեի թալանը կշարունակեն, այս անգամ՝ ավելի մեծ ախորժակով, չէ՞ որ ներսում կա կուտակված տարիների պայքարի «աբիժնիկությունն» ու «չտեսությունը»:

Մի քանի օր է, ինչ լայնորեն քննարկվում է մարզպետների պարգևատրումների, 13-րդ աշխատավարձի մասին հրապարակումները: Շատերն ասում են՝ նորմալ է, օրինական է, սակայն մոռանում են, որ օրենքի սահմանմամբ պետք է առնվազն 6 ամիս գրանցված աշխատող լինեին, որ պարգևատրման արժանանային, իսկ այս նորեկները, ովքեր օրենքներից տառ անգամ չեն կարդացել, մեկ ամսվա աշխատողին պարգևատրում են, պարգևատրվածն էլ հաջորդ ամսվանից այլ՝ ընտրովի պաշտոն է սկսում զբաղեցնել:

Լիլիթ Մակունցն էլ ասում է՝ չգիտեմ օրենքն ինչ է թուլ տալիս, բայց մարզպետները գործել են օրենքով սահմանված կարգով: Մակունցին պետք է հիշեցնել, որ օրենքի չիմացությունը չի ազատում պատասխանատվությունից, և իրենց քաղաքական թիմը պետք է քաղաքական պատասխանատվություն ստանձնի մարզպետներին նման քայլ համատարած թույլ տալու մեջ:

Միամտություն է կարծելը, թե մարզպետներն ինքնուրույն են որոշել նման քայլի գնալ. կա քաղաքական վերնախավի «դաբրո», որը կրկին «թիվ ու թամասա», «օրենք ու տառ» չի ճանաչում:

Այսպես՝ Կոտայքի մարզպետ Ռոմանոս Պետրոսյանը բյուջեից պարգևատրումներ է հատկացրել՝ շուրջ 5 միլիոն 792 հազար 728 դրամ:

Արմավիրի մարզպետ Համբարձում Մաթևոսյանը պարգևատրել է նաև ինքն իրեն, իսկ բյուջեից արված պարգևատրումների թիվը կազմում է 1 մլն 718 հազար դրամ:
Արարատի մարզպետ Գարիկ Սարգսյանը մարզպետարանում աշխատող 15 անձանց, այդ թվում իրեն, պարգևատրել է 104.5% դրույքաչափով: Հաշվի առնելով, որ Արարատի մարզպետի աշխատավարձը 661,400 դրամ է, 104.5%-ի դեպքում պարգևատրման չափը կազմում է 691,163 դրամ, տեղակալներինը՝ 529,120 դրամ, պարգևատրվել են 552,930 դրամով:

Սյունիքի մարզպետ Հունան Պողոսյանն անմասն չի մնացել գործընկերներից, նա ևս դրամական պարգևներով խրախուսել է աշխատակիցներին:

Հատկապես աչքի է ընկնում այն հանգամանքը, որ վերջինս ինքն իրեն մեկ օրում երկու անգամ է խրախուսել։ Նա 22 անձանց, այդ թվում՝ իրեն՝ մեկ անգամ պարգևատրել է 51.82 % չափով, երկրորդ անգամ՝ նույն անձանց և նորից իրեն, 15․34 %-ով։

Վայոց ձորի մարզպետ Տրդատ Սարգսյանի կողմից արված պարգևների թիվն ընդհանուր առմամբ կազմել է 1 մլն 321 հազար 405 ՀՀ դրամ։

Սա է մեր նոր իշխանությունների պատկերը, սեփական շահի մասին մտածող, աղքատին մոռացող և խոստումներից հրաժարված պաշտոնյաներ 

 NESWSPRESS.am