Միրզոյանի դատարկ աթոռը. հավես չկա աշխատելու

Իսկ ո՞ւր է Արարատ Միրզոյանը:

Ազգային ժողովում այսօր շարունակվում էին մշտական հանձնաժողովների նախագահների թեկնածությունների քննարկումները։ Ազգային ժողովի նիստի մեկնարկին ներկա էր Ազգային ժողովի ղեկավար կազմը, սակայն շատ կարճ ժամանակ անց՝ ընդմիջումից հետո, Արարատ Միրզոյանի լուսապայծառ երեսն էլ չտեսանք։

Միրզոյանն այս աշխատանքային օրվա ընթացքում աշխատել է ընդամենը մեկ-երկու ժամ, որից հետո՝ անհետացել։ Եվ սա անում է այն պաշտոնյան, ով հայտարարում է, որ ազնվորեն ծառայելու է այն ժողովրդին, ում վճարած հարկերով ստանալու է բարձր աշխատավարձ, շրջելու է ծառայողական մեքենայով, հանուն այդ ժողովրդի գործուղվելու է աջ ու ձախ։

Միրզոյանն ընդամենը երեք օր առաջ է ընտրվել նման կարևորագույն պաշտոնում և թվում էր, որ առավոտյան ժամը 10։00-ից մինչև 18:00-ն քրտնաջան աշխատելու է՝ դարձյալ իր սիրելի ժողովրդի համար, սակայն դա մեզ միայն թվում էր։

Միրզոյանն իր այս գործելաոճով հիշեցնում է հայտնի կոճակ սեղմող հանրապետականներին, ովքեր ԱԺ էին գալիս միայն նիստերի օրերին, կոճակ սեղմելու և գրանցվելու, այնուհետև ժամը 12-ից ԱԺ-ի շենքը լքելու համար։

Փաստորեն, ինչպես շատ հարցերում՝ անհավես աշխատելու հարցում ևս՝ ՀՀԿ-ից չեն տարբերվում։

Իսկ Նիկոլ Փաշինյանը թող շարունակի կոկորդը պատռել, թե ՀՀԿ-ականներին նման են միայն երկու աչք, մի քիթ ու ու մի բերան ունենալով: Նրա թիմակիցներն իրեն ու բոլորին ամեն օր հակառակն են ապացուցում: