Ժամանակը կարող է աշխատել ի վնաս Հայաստանի

Ոմանց կոկորդին չոր ոսկորի նման ցցված Ռոբերտ Քոչարյանի խափանման միջոց կալանավորումը գրավով փոխարինելու դատական նիստն արդեն տևական ժամանակ է՝ ձգձգվում է. մի տեսակ՝ չի ստացվում:

Նման միջնորդությունը քննելու համար նախատեսված դատական նիստը նախ հետաձգվեց տարեվերջին, ապա նաև այսօր, քանի որ դատախազը բացարկ հայտնեց դատավորին: Չի բացառվում, որ այդ միջնորդության քննությունը հետաձգվի նաև վաղը՝ հունվարի 10-ին:

Այս անիմաստ ձգձգումների պատճառը շատ ավելի խորքային և մտահոգիչ է, քան կարող է թվալ առաջին հայացքից:

Նման ձգձգումները գնալով ավելի ակնառու են դարձնում մի ընդգծված փաստ՝ Քոչարյանը կանգնել է ոմանց կոկորդին: Այս թնջուկը կարծես թե չի կարողանում լուծել այն ստեղծած իշխանությունը, իսկ որ ամենավատն է՝ Հայաստանը կրում է նաև նյութական կորուստներ՝ նրանց այդ անճարությունից. Չէ՞ որ լուրջ հիմքեր ունեն այն խոսակցությունները, որ ՌԴ նախագահ Վլադիմիր Պուտինը Հայաստանին մատակարարվող գազի գինը հենց այնպես չթանկացրեց: Դա ակնարկ էր նոր իշխանություններին՝ հեռու քաշել ձեռքերն իր մտերիմից:

Պատահական չէ, որ ՌԴ նախագահը Մոսկվայում Փաշինյանի հետ հանդիպումից հետո շնորհավորեց Ռոբերտ Քոչարյանի Նոր տարին՝ նրան մաղթելով ոգու ամրություն, տոկունություն:

Պուտինն իր այս քայլով իր անվերապահ աջակցությունն է հայտնել կալանավորված էքս նախագահին՝ ցույց տալով նաև, որ այդ աջակցության չնչին տոկոսն անգամ չունի Նիկոլ Փաշինյանը:

Քոչարյանի գործով դատական նիստերը հետաձգելով, հայաստանյան իշխանությունները փորձում են ժամանակ շահել հայ-ռուսական հարաբերություններում մտած լարվածությունը մեղմելու, գազի թանկացման հետ կապված հարցերը կարգավորելու համար, որպեսզի Մոսկվայի բարկությունն անդառնալի հետևանք չունենա հայաստանյան իշխանությունների համար:

Իսկ մինչ իշխանությունները ժամանակ են ձգում, Ռոբերտ Քոչարյանի պաշտպանական թիմն արդեն երկրորդ գանգատն է ուղարկել ՄԻԵԴ ու չի բացառվում, որ պրոֆեսիոնալիզմի բացակայության պատճառով ՄԻԵԴ-ը ՀՀ կառավարությանը պատավորեցնի մի կլորիկ գումար վճարել Քոչարյանին ու կստացվի, որ Փաշինյանը կրկին ուզում էր ամեն ինչ անել հանուն ժողովրդի, բայց ստացվեց ինչպես միշտ՝ ի վնաս: Գազի թանկացումը վկա:

NEWSPRESS.am