Երբ քաղաքապետդ ոչ միայն ամոթ չունի, այլ նաև անգրագետ և ստախոս է

Երևանի ավագանու երեկվա նիստում դերասան քաղաքապետ Հայկ Մարությանը փայլեց իր անտաղանդությամբ և տգիտությամբ՝ նրան քաղաքապետ դարձրած երևանցիների համար ևս մեկ անգամ փաստելով՝ քաղաքապետի պաշտոնը թթու թան չէ, ամեն մարդու բան չէ։

Պարզվում է՝ Մարությանը շատ լավ է իրեն զգում բեմում, բայց ոչ քաղաքապետարանի նիստերի դահլիճում, որտեղ իրեն ուղղված ամեն մի հարցից ծույլիկ աշակերտի նման կարմրում է մինչև ականջների ծայր՝ չունենալով համապաասխան գրագիտություն այդ հարցերին պատասխաններ տալու համար։

Մարությանը երեկ ցույց տվեց քաղաքապետի պաշտոնում իր ողջ թշվառությունը՝ վերահաստատելով այն, ինչի մասին բազմիցս գրել ենք, սակայն մեկ հավելումով․ նա ոչ միայն ամոթ չունի, այլ նաև անգրագետ և ստախոս է, ուստի, եթե ունի գոնե թասիբ, պետք է հրատապ կարգով հրաժարվի քաղաքապետի պաշտոնից և անցնի այն աշխատանքին, ինչն իսկապես իրենն է՝ դերասանությանը։

Ի վերջո, ավելի լավ է լինել հաջողված դերասան, քան խայտառակ քաղաքապետ, իսկ այն, որ Մարությանը մինչև մազերի ծայրը խայտառակված է, փաստ է, ինչը երեկ էլ ավելի ակնառու դարձավ նրա հերթական «բլթոցից» հետո։

Պարզվում է՝ Հյուսիսային պողոտայում ծվարած դերասանի համար 55 հազար դրամ աշխատավարձը կարող է դառնալ ծաղրի առարկա․

«Դուք եղել եք անցած ավագանու անդամներ, ստացել եք էդ 55.000 դրամները: Ոչ մի բան չեք արել, ըստ իս, որովհետև մենք ունենք պրոբլեմատիկ զեկույց... Ավելորդ եմ համարում նույնիսկ մեկնաբանել այս էժան հայտարարությունը»,-ասաց Մարությանը Երևանի ավագանու անդամներին՝ երբ նրան վերջիններիս հիշեցրին, որ ավագանու ընտրությունններից առաջ խոստումներ է տվել, իսկ հիմա դրանք չի կարողանում կատարել, կամ կարճ ասած՝ ստում է։

Այո՛, Մարությանը ստում է՝ «Սանիտեկի», Երևանի տրանսպորտային ցանցը փոխելու, քաղաքի բազմաբնակարան շենքերը մահացու վերելակներից ազատելու, փողոցային առևտրի վերացման և բազմաթիվ այլ հարցերում։

Իսկ ստախոսը Երևանի քաղաքապետարանի պաշտոնում տեղ չունի․ այդ պաշտոնում տեղ չունի նաև սեփական մայրենիին չտիրապետող քաղաքապետը։

Ուստի, եթե քաղաքացիների վճարած հարկերի հաշվին որոշել է քաղաքապետարանի աշխատակիցներին ուղարկել անգլերենի դասընթացների, ապա հայերենի իմացության դասընթացների էլ ինքը պետք է մասնակցի․ դա նրա պարագայում անհրաժեշտություն է։ 

NEWSPRESS.am