«Լայվ, լայվ․․․»․ ակցիայի մասնակիցները պահանջում են Փաշինյանի կամ դատախազի ֆեյսբուքյան «համոզիչ լայվը»

ՀՀ գլխավոր դատախազությունը վերաքննիչ բողոք կներկայացնի ԵԿՄ նախկին նախագահ, գեներալ-լեյտենանտ Մանվել Գրիգորյանին գրավի դիմաց կալանքից ազատ արձակելու վերաբերյալ առաջին ատյանի դատարանի որոշման դեմ։

Այդ մասին լուրը լրատվական կայքերի հրապարակումներից կարդացին Էջմիածնի ճանապարհը փակած ցուցարարները։ Սակայն դա նրանց համար իրենց բարձրացրած պահանջի լուծում չէ։

Այժմ նրանք պահանջում են դատախազ Արթուր Դավթյանն ինքն անձամբ կամ էլ վարչապետի ժ/պ Նիկոլ Փաշինյանը ֆեյսբուքյան լայվով հաստատեն դատախազության որոշումը։

Բողոքի ակցիայի մասնակիցներից մի քանիսն էլ դեմ են այս առաջարկին․

«Էս ա վարչապետը լայվ կմտնի, կասի՝ գնացեք տներով, սաղ հարցերը կլուծենք ու ոչ մի բան էլ չեն անի։ Եթե հարց լուծող էին, ինչո՞ւ մինչև ընտրությունները չէին բաց թողնում՝ որ գնանք իրենց ընտրե՞նք։ Մեզ կխաբեն ու ոչ մի բան էլ չեն անի»,-ասացին էջմիածինցիները։

Նրանց չկարողացավ համոզել անգամ «Իմ քայլը» դաշինքով Էջմիածնից ընտրված պատգամավորը, ով եկել էր անձամբ հայտնելու դատախազության որոշումը և հորդորելու քաղաքացիներին՝ բացել ճանապարհը։

էջմիածինցիները մնացին անդրդվելի։ Նախաձեռնողներից մեկը բղավեց․ «Ժողովուրդ լա՞յվ եք ուզում, թե՞ անձամբ գան», ինչին հավաքվածները արձագանքեցին․ «լայվ, լայվ, լայվով թող ասեն»․․․

Նկատենք, որ անցորդներին նյարդայնացնում է ստեղծված իրավիճակը և նրանք բոլորը պահանջում են բացել ճանապարհը։