Ոնց գցում- բռնում եմ՝ դու ամոթ չունես

Պարզվում է՝ Երևանի քաղաքապետ Հայկ Մարությանը երբեք էլ հրաշքներին և Ձմեռ պապիկներին չի հավատացել:

Քաղաքապետ կարգված Մարությանն այս մասին այսօր իր սիրելի վայրում՝ Հանրապետության հրապարակում է խոստովանել՝ Հանրապետության գլխավոր տոնածառի լույսերը վառելիս, որին ներկա էր նաև Մարությանի կնքահայրը՝ Փաշինյան Նիկոլը:

«Ամանորին հրաշքներ են կատարվում: Մինչև 2018 թ.-ը ես հրաշքներին չէի հավատում, բայց միևնույնն է, ինչպես ամեն տարի՝ 2018 թ.-ի Ամանորին նույնպես երազանք պահեցի, և 2018թ.-ի գարնանը իմ երազանքը կատարվեց»,-ասաց Մարությանն ու դստեր հետ միասին վառեց տոնածառի լույսերը:

Փաստորեն, այսքան տարի աչքներիս առաջ մեծացած կարգին Հայկոն երբեք էլ հրաշքներին չի հավատացել, մինչ այն պահը, երբ կարգվեց քաղաքապետ:

Քնել-արթնացել ու Սերժ Սարգսյանի ռեժիմից ազատվելու մասին է երազել, ու դա չի խանգարել մեր անհավատին՝ հայտնի թերթերից մեկին իր տված հարցազրույցում ասել, որ երջանիկ է, որ իր դուստրը ծնվել է Սերժ Սարգսյանի երդմնակալության օրը:

Բնականաբար, Հայկո՛, ոչնչից միանգամից Երևանի քաղաքապետ դառնալը հրաշք է, դա ամեն մեկին չի «տրվցվում», և բնական է, որ քո կյանքում դու հավատացել ես միայն ու միայն 2018 թվականի գարնան հրաշքին: 

Բայց ամուր պահիր այդ հրաշքը, հակառակ դեպքում՝ կարող ես շատ արագ զրկվել դրանից, եթե մի քանի անգամ էլ ասես մի բան, անես հակառակը. Իսկ քեզ հրաշք պարգևած հանրությունը շատ լավ հիշողություն ունի:

Նա շատ լավ է հիշում, թե Երևանի ավագանու ընտրությունների քարոզարշավի ժամանակ ինչպես էիր երդվում՝ ազատել քաղաքը «Սանիթեք»-ից, ներգրավել նոր օպերատոր, ինչը դու չես արել և չես պատրաստվում անել: 

Նույն հանրությունը շատ լավ հիշում է քաղաքային տրանսպորտը շատ արագ փոխելու քո երդումների մասին, որը ևս օդում կախված է, ինչի վառ ապացույցն այսօրվա ավագանու նիստից հետո լրագրողների հետ քո կցկտուր ճեպազրույցն է:

Այս չկատարված խոստումները շատ են, չթվենք բոլորը, պարզապես նկատենք, որ ոնց գցում- բռնում ենք, մի բան ենք հասկանում՝ դու ամոթ չունես:

Ի դեպ՝ կրկին չարչրկված տոնածառի մասին:

Պարո՛ն Մարության, իսկ այն մաքսազերծվե՞լ է…

NEWSPRESS.am-ի հիմնադիր՝

Արմենուհի (Արիանա) Հովսեփյան