Մենք հավատարիմ ենք մեր հիմնարար արժեքներին՝ ստեղծել օրենքի երկիր. Սիմոն Հակոբյան

NEWSPRESS.am-ի զրուցակիցն է «Օրինաց Երկիր» կուսակցության փոխնախագահ Սիմոն Հակոբյանը:

-Պարոն Հակոբյան, ԱԺ արտահերթ ընտրություններից հաշված օրեր են անցել: Ինչպես ասում են՝ տպավորությունը դեռ թարմ է. ՕԵԿ ռեյտինգային թեկնածու էիք ՀՀ Գեղարքունիքի մարզում՝ թիվ 8 ընտրատարածքում: Ի՞նչ մնաց ընտրություններց:

-Նախ, նշեմ, որ ինչպես նախորդ, այնպես էլ վերջին ընտրություններում պատիվ ունեի ՕԵԿ կուսակցության կողմից առաջադրվել ՀՀ ԱԺ պատգամավորության թեկնածու իմ հարազատ՝ Գեղարքունիքի մարզում: Մինչ այս լինելով կուսակցության երիտասարդական միության նախագահըմ շուրջ 14 տարի լինելով Օրինաց Երկիր կուսակցության անդամ՝ հպարտությամբ եմ կրել ու կատարել մեր քաղաքական թիմի ու նրա առաջնորդի՝ Արթուր Բաղդասարյանի գաղափարները, անմնացորդ նվիրվել մեր գաղափարակից ընկերների պայքարին՝ հանուն օրինական, անվտանգ ու զարգացող Հայաստանի, Արցախ աշխարհի ու համայն հայության:

Ինչ վերաբերում է ԱԺ արտահերթ ընտրություններին, ապա, ինչպես մեր կուսակցության երկարամյա ու բազմափորձ նախագահ, պետական գործիչ Արթուր Բաղդասարյանն է բազմիցս նշել հեղափոխության օրերին և դրան հաջորդող ժամանակահատվածում, ընտրություններն անհրաժեշտ էին՝ որպես լուսավոր, ժողովրդային շարժման վերջնական հաղթանակն ապահավող երաշխիք: Այժմ ունենք այն, ինչ ունենք:

-Նշեցիք Արթուր Բաղդասարյանի անունը. չեմ կարող չանդրադառնալ մեծ քաղաքականությունից և կուսակցության նախագահի պաշտոնից հեռանալու մասին՝ նրա՝ օրերս արված հայտարարությունը: Այդ լուրն, ի դեպ, դրական որակեցին ինչպես քաղաքական, հասարակական, այնպես էլ մասմեդիայի լայն շրջանակները՝ Արթուր Բաղդասարյանի քայլը համարելով աննախադեպ, հարգանքի արժանի…

- Իհարկե, երիտասարդ տարիքում և, առհասարակ, իր գործունեության ընթացքում, բոլոր հնարավոր հաջողություններին հասած մեծանուն գործիչը՝ Արթուր Բաղդասարյանը, հերթական անգամ ապացուցեց, որ իր յուրաքանչյուր քայլ խոհեմության, ողջամտության և պետական մտածողության վկայություն է: Իսկ, ի՞նչ է, բացառիկ ու հարգանքի արժանի քայլ չէ՞ր, երբ ՕԵԿ նախագահը հրաժարվեց ԱԺ նախագահի, Ազգային Անվտանգության խորհրդի քարտուղարի պաշտոններից: Կա՞ մեկը նորանկախ Հայաստանի պատմության մեջ և, ընդհանրապես, մեր տարածաշրջանում, հետխորհրդային երկրներում, որ կամովին հեռացել է երկրի ամենաբարձր պաշտոններից՝ ոչ թե նեղանձնային, նեղկուսակցական շարժառիթներով, այլ պետական, հասարակական, քաղաքական գործչի սկզբունքային դիրքորոշմամբ: Կամ հիշո՞ւմ եք մի դեպք, երբ ԱԺ նախագահը խստորեն քննադատի երկրի գործող իշխանություններին՝ կասեցնելով վերջիններիս կողմից պետության հարստությունն օտարելու կամ մասնավորեցնելու արատավոր քաղաքականությունը, ջանքերը… Այս ամենը փաստարկված է, գոյություն ունեն արխիվային կադրեր, առկա է բաց տեղեկատվություն, սև քարոզչության ու կանխակալության փոխարեն անհրաժեշտ է սթափ լինել ու իրերը կոչել իրենց անուններով …

-Այդ դեպքում, ծանր չէ՞, արդյոք, Ձեր ու Ձեր նոր գործընկերների, ՕԵԿ նոր ղեկավարության, քաղաքական խորհրդի բեռն ու առաքելությունը:

-Մեր առաջնորդի՝ քաղաքականությունից ու «Օրինաց Երկիր» կուսակցության նախագահի պաշտոնից հեռանալն, անկասկած, մեծ ու, անկեղծ ասած, ոչ հաճելի անակնկալ էր ինչպես մեր քաղաքական ամբողջ թիմի, այնպես էլ՝ նրա գաղափարները գնահատող ՀՀ քաղաքացիների, քաղաքական ու հասարական գործիչների համար: Նրա քայլը նաև սթափեցնող էր քաղաքական մյուս ուժերի համար, ինչի մասին մամուլում վերջին օրերին հնչում են դրական տեսակետներ: Որոշումն ինքնին ուսուցանող է ու պարտավորեցնող:

Բայց, կարծում եմ, որ ՕԵԿ-ը՝ որպես Արթուր Բաղդասարյանի «քաղաքական հոգեզավակ», որպես նորանկախ Հայաստանի խորհրդարանական տարեգրության ամենից բեղուն, օրինաստեղծ ուժ, չի կարող ավարտել իր հաշիվները ոչ քաղաքականության, ոչ էլ ժողովրդի ու պետության հետ. Հիշեցնեմ, որ Արթուր Բաղդասարյանը նշեց, որ քաղաքական դաշտ կվերադառնա միայն ժողովրդի պահանջով, վստահ եմ՝ այդ պահանջը երկար սպասել չի տալու, քանի որ մեր երկիրն այսօր ունի Արթուր Բաղդասարյանի նման փորձառու գրագետ և հայրենասեր, քաղաքական գործիչի կարիքը:

Ժողովրդանպաստ բազում օրենքների հեղինակ, պետականամետ հարյուրավոր որոշումներ գեներացնող ու դրանց համար պայքարող «Օրինաց Երկիր» կուսակցությունը պետք է, պարտավոր է և անելու է լրջագույն բարեփոխումներ ինչպես ներկուսակցական, այնպես էլ՝ գործունեության ոլորտներում, որովհետև մենք հավատարիմ ենք մեր հիմնարար արժեքներին՝ ստեղծել օրենքի երկիր, ստեղծել մարդու իրավունքների գերակայության երկիր, նպաստելով ժողովրդի ու պետության արժանապատիվ բարեկեցությանն ու հզորացմանը: Հենց սա է՛ մեր գլխավոր առաքելությունը, որ հանձնառու և բարեխիղճ կերպով իրականացնելու ենք ՕԵԿ քաղաքական ղեկավարության ու շարքային նվիրյալների համատեղ ջանքերով :