«Երբ ուզում ես հարսանիքի միջոցառումը լավ անցնի, պետք է մտածես, թե որ սեղանին ում նստեցնես». Անդրեաս Ղուկասյան

ՀՀԿ-ն ձգտում էր ստեղծել այնպիսի իրավիճակ, որ գործադիր, օրենսդիր և դատական իշխանությունների բոլոր հարցերը որոշվեր ՀՀԿ-ի ներսում, այսօր նույն իրավիճակը «Իմ քայլը» դաշինքն է ստեղծել: Այս մասին լրագրողների հետ զրւոյցում ասաց Կառուցողական կուսակցության ղեկավար Անդրիաս Ղուկասյանը:

Ըստ նրա՝ կուսակցության ներսում կարող են որոշումներ կայացվել, որոնք պարտադիր կլինեն և՛ գործադիր, և՛ օրենսդիր իշխանությունների համար:

«Սա ահազանգ է, որ քաղաքական ուժերը միավորվեն Սահմանադրության փոփոխության շուրջ, որը կստեղծի այնպիսի մեխանիզմ, որը կբացառի որևէ ուժի կողմից նման իշխանական մոնոպոլիա ունենալու հնարավորությունը»,-ասաց Անդրեաս Ղուկասյանը:

Նա նկատում է, որ այսօր մեր հասարակությունը դրական է համարում այդ ամենը, քանի որ միայն այդկերպ հնարավոր եղավ հեռացնել ռեժիմին, սակայն երկիրը ղեկավարելու տեսակետից, ցանկացած մենաշնորհ չարաշահումների մեծ դաշտ է ստեղծում:

«Դա հասկանում են և՛ աջերը, և՛ ձախերը, որոնք չեն հայտնվել խորհրդարանում»,-ասաց նա:

Հարցին, թե ինչու ընտրություններից առաջ քաղաքական ուժերի չմիավորվեցին, Անդրեաս Ղուկասյանը պատասխանեց, որ դա արտախորհրդարանական տիրույթում գլխավոր հարցն է, որն ունի տարբեր պատճառներ:

«Կան շատ պատճառներ, թե ինչու տարբեր քաղաքական ուժեր իրար հետ դժվար են համագործակցում: Երբ ուզում ես հարսանիքի միջոցառումը լավ անցնի, պետք է մտածես, թե որ սեղանին ում նստեցնես, որ բարեկամներին, որ չլինի այնպես, որ տոնական վիճակը փչանա՝ մարդկանց հակասությունների պատճառով: Նույնը քաղաքական դաշտում է»,-ասաց Ղուկասյանը:

Նա ինքն այժմ վարում է բանակցություններ տարբեր քաղաքական ուժերի հետ և փորձում է գտնել այնպիսի կոնֆիգուրացիա, որպեսզի լինի մի միավորում, որտեղ բոլոր փոքր ուժերը կարողանան ազդեցիկ սուբյեկտ լինել:

«Հիմա արտախորհրդարանական տիրույթում դա օբյեկտիվորեն ձևավորվող գործընթաց է»,-ասաց նա: