Փաշինյանը մերժեց Բակո Սահակյանին․ Լևոն Մնացականյանը հեռացավ

Երկու օր էր՝ ողջ օնլայն մեդիան գուժում էր Արցախի պաշտպանության բանակի հրամանատար Լևոն Մնացականյանի աշխատանքից ազատման հրամանի մասին: Այսօր արդեն եղավ դրա պաշտոնական հաստատումը:

Կրքերը լարվեցին հատկապես երեկ, երբ հայտնի դարձավ, որ Հայաստան է այցելել Արցախի նախագահ Բակո Սահակյանը և հանդիպել վարչապետի պաշտոնակատար Նիկոլ Փաշինյանի հետ։

Պաշտոնական խողովակներից որևէ այլ բան հայտնի չէ, քան այն, որ Փաշինյանն ու Բակո Սահակյանը խոսել են

«հայկական երկու հանրապետությունների ներքին և արտաքին քաղաքականությանը, անվտանգությանը, Արցախի Հանրապետության և Հայաստանի Հանրապետության 2019 թվականի պետական բյուջեների ձևավորմանը վերաբերող հարցերի մասին»:

Սա պաշտոնական հաղորդագրությունից մեջբերում է, սակայն ակնհայտ է, որ Բակո Սահակյանին Հայաստան բերող պատճառը բոլորովին այլ է։

Վստահաբար, նա Փաշինյանին էր այցելել կրքերը թուլացնելու համար, իսկ որ կրքերը բորբոքեցին Փաշինյանն ու Սասուն Միքայելյանը, դա ակնհայտ է, չէ՞ որ նախընտրական արշավի ժամանակ Սասուն Միքայելյանը հայտարարել էր, թե հեղափոխության հաղթանակն ավելի կաևոր էր, քան Արցախյան ազատամարտը, ինչին արձագանքել էր Արցախի ՊԲ հրամանատարի մամուլի խոսնակ Սենոր Հասրաթյանը ֆեյսբուքյան իր էջում․

«Ե՞րբ է մարդու ասածը ոչ միանշանակ ընդունվում: Երբ ասելիք չունի, բայց ունի խոսելու ցանկություն: Ապացույցը Սասուն Միքայելյանի կողմից այսօր արված հայտարարությունը կամ, ավելի ճիշտ՝ համազգային երեւույթները մեկը մյուսին վերադասելու կամ ստորադասելու փորձն է»: 

Սասուն Միքայելյանի հայտարարությունը քննադատեցին նաև Վիտալի Բալասանյանն ու այլք, ինչին ի պատասխան՝ Փաշինյանը քարոզարշավի ժամանակ մատ թափ տվեց ու հրահանգեց կարգի հրավիրվել բոլորին։

Եվ այս ամենի ֆոնին հայտնի դարձավ նաև, որ Լևոն Մնացականյանը նշանակվել է Արցախի արտակարգ իրավիճակների ծառայության տնօրեն և Բակո Սահակյանն արդեն իսկ ստորագրել է նրան ազատելու հրամանը։

Փաստորեն, Բակո Սահակյանին երեկ այդպես էլ չի հաջողվել կրքերը թուլացնել, և Փաշինյանն էլ մնացել մնացել է իր կարծիքին՝ մոռանալով թե ինչ կարգավիճակում գտնվող պետության, բանակի հրամանատարի մասին է խոսքը։

Այս փոթորիկը կարող է շատ վատ անդրադառնալ կիսապատերազմական երկրին, որտեղ խոսնակի մակարդակով արված գրառումը դառնում է բանակի հրամանատարի աշխատանքից ազատման պատճառ։

Փաստորեն, Փաշինյանն իր կամքն է պարտադրում նաև Արցախին, իսկ որ ամենավատն է՝ սկսել է խառնել խաղաքարտերը։

NEWSPRESS.am