Այո, Հայաստանը դեմ էր, բայց մենք պայմանավորվել էինք. Լուկաշենկոն մանրամասներ է հայտնել ՀԱՊԿ երկրների պայմանավորվածությունից

Ռուս լրագրողները Բելառուիսի նախագահ Ալեքսանդր Լուկաշենկոյի հետ հանդիպման ժամանակ շոշափել են ՀԱՊԿ գլխավոր քարտուղարի նշանակման հարցը: Այդ մասին հայտնում է բելառուսական «ԲԵԼՏԱ» գործակալությունը՝ հղում անելով իր թղթակցին:

Ինչպես նշել է բելառուսական պետության ղեկավարը, ՀԱՊԿ գլխավոր քարտուղարի նշանակման ձգձգման խնդիրը Բելառուսը չի ստեղծել. «Ամոթ է, որ մենք չենք կարողանում ՀԱՊԿ գլխավոր պաշտոնյային ընտրել»,- տեսակետ է հայտնել Լուկաշենկոն՝ մեկնաբանելով բարդ իրավիճակը: 

Անդրադառնալով Նիկոլ Փաշինյանի կտրուկ արձագանքին՝ Լուկաշենկոն ընդգծել է. «Խնդիրը մենք չենք ստեղծել, այլ ինքը: Ստեղծեց, ու եղավ այս խնդիրը, նստեցրին կազմակերպության նախկին ղեկավարին: Եթե դու խելացի մարդ ես, ապա հանդարտ կարելի էր լուծել այդ հարցը՝ ընտրել նոր ղեկավար: Նա այդտեղ այդքան էլ մեծ դեր չի խաղում, և այս խնդիրը չէր լինի: Ոչ, Նիկոլ Փաշինյանը մեզ թաթախեց ներքաղաքական խնդիրների մեջ: Այն, ինչ Հայաստանում կատարվել է, մենք չենք արել, քննարկումների ընթացքում ինքը մեզ այնտեղ մտցրեց, որ այնտեղ ընտրություններ են և այլն»:

Ալեքսանդր Լուկաշենկոն հստակեցրել է իր դիրքորոշումը. «Քանի որ մենք հաջորդն էինք և Հայաստանից պետք է ընդունեինք էստաֆետը, ինձ այդ թեմայով անհարմար էր խոսել, թվում է, որ ես ձգտում եմ, որ լինի մեր մարդը: Ոչ, այդ Նուրսուլթան Նազարբաևը, ապա նաև Վլադիմիր Պուտինն ու մնացածներն աջակցեցին, որ նախագահությունը փոխանցվի, և ղեկավարն ընտրվի հաջորդ երկրից, որը Բելառուսն էր: Ես ասացի՝ լավ, մենք դրան պատրաստ ենք, ընդամենը մեկ տարի անց մենք պետք է մեր ներկայացուցչին առաջարկեինք, թող լինի»:

«Հետո Նուրսուլթան Նազարբաևը, պատասխանեց լրագրողներին, որ բելառուսներն են հաջորդը նախագահելու, և փաստորեն, այդ մասին պայմանավորվել էինք: Այո, Հայաստանը դեմ էր, բայց դրա մասին, ըստ էության, պայմանավորվել էինք: Ղազախստանի նախագահն այդ մասին ասաց: Հետևեց Նիկոլ Փաշինյանի կտրուկ արձագանքը»,- շարունակել է Լուկաշենկոն: 

Նա կարծիք է հայտնել, որ ամեն դեպքում նման հարցերում պետք է խելացիություն դրսևորել, ինչն էլ անում են փորձառու քաղաքական գործիչները: Ինչ վերաբերում է բարդացող իրադրությանը, ապա նա համաձայնել է նույնիսկ այն բանին, որ Բելառուսից հետո ռոտացիոն կարգով նախագահելիք երկիր Ղազախստանը ստանձնի նախագահությունը: