«Եվրամիություն. ինքնիշխան եվրոպական պետությունների միություն, թե՞ Բրյուսելի թելադրանք». միջազգային կոնֆերանսի արդյունքները (լուսանկարներ, տեսանյութ)

2018թ. դեկտեմբերի 10-ին Սլովակիայի մայրաքաղաք Բրատիսլավայում կայացավ «Եվրամիություն. ինքնիշխան եվրոպական պետությունների միություն, թե՞ Բրյուսելի թելադրանք» խորագրով միջազգային կոնֆերանսը: Կոնֆերանսը կազմակերպել էր Եվրոպայում հայտնի քաղաքական և հասարակական գործիչ Քաղաքական և տնտեսական վերլուծությունների ու կանխատեսումների համաեվրոպական կենտրոնի (ՊԱՆԱՊ) համանախագահ և «Եվրոպայի հայկական միությունների ֆորումի» (ԵՀՄՖ) նախագահ դոկտոր Աշոտ Գրիգորյանը: Կոնֆերանսը բացեցին «ՊԱՆԱՊ»-ի համանախագահներ Սլովակիայի նախկին վարչապետ Յան Չարնոգուրսկին և դոկտոր Աշոտ Գրիգորյանը:

Հազվագյուտ բարձր մակարդակով կազմակերպված այս կոնֆերանսին հրավիրված էին հայտնի քաղաքական գործիչներ, դիվանագիտական կորպուսի ներկայացուցիչներ ու փորձագետներ մի շարք եվրոպական երկրներից, Ռուսաստանից, Չինաստանից, Հայաստանից և Ղազախստանից: Զեկույցներով հանդես եկան «ՊԱՆԱՊ»-ի համանախագահ և Սլովակիայի նախկին վարչապետ Յան Չարնոգուրսկին, Չեխիայի Դիվանագիտական ակադեմիայի ռեկտոր, Չեխիայի նախկին փոխվարչապետ ու ԱԳ նախարար Ցիրիլ Սվոբոդան, Սլովակիայի Գերագույն դատարանի սենատի նախագահ, Սլովակիայի նախկին փոխվարչապետ և արդարադատության նախարար Շտեֆան Հարաբինը, Սլովակիայի նախկին ԱԳ նախարար Պավոլ Դեմեշը, բրիտանացի լրագրող՝ «The Guardian» թերթի թղթակից ու հրապարակախոս Ջոնաթան Սթիլը, գերմանացի լրագրող, քաղաքագետ և հայտնի հրապարակախոս Ալեքսանդեր Ռարը, հայտնի վերլուծաբան Վիկտոր Յասմանը (ԳԴՀ, Իսրայել), հայտնի տնտեսագետ ու համաշխարհային ֆինանսների գծով փորձագետ Անդրեյ Կոբյակովը (ՌԴ), քաղաքագետ և Մերձավոր Արևելքի գծով փորձագետ ու «ՊԱՆԱՊ–Դաշինք հանուն խաղաղության պահպանման» կենտրոնի ռուսաստանյան ներկայացուցիչ Կարինե Գևորգյանը (ՌԴ), ճանաչված քաղաքագետ Արայիկ Ստեփանյանը (ՌԴ), ՀՀ ԱԺ առաջին գումարման պատգամավոր, իրավաբան Սեյրան Գրիգորյանը (ՀՀ), ինչպես նաև քաղաքագետներ Կարլիգաշ Նուգմանովան ու Արման Թեմիրջանովը Ղազախստանից:

Կոնֆերանսի ընթացքում քննարկվեցին Եվրոպայի առջև ծառացած, այդ թվում նաև Արևմուտքի և Արևելքի միջև առկա մի շարք արդիական հիմնահարցեր, ինչպիսիք են ԵՄ-ում տիրող իրավիճակը, ԵՄ-ի և ԵԱՏՄ-ի միջև հարաբերությունների համագործակցային/մրցակցային բնույթը:

Մեծ հետաքրքրությամբ լսվեց «Հայաստանը որպես իսլամական ծայրահեղականությանը և ահաբեկչությանը դիմակայելու նոր պլացդարմ» թեմայով Սեյրան Գրիգորյանի ելույթը: Մերձավոր Արևելքում երկարաժամկետ խաղաղության հաստատման հեռակարներին ու համաշխարհային պատերազմի ծավալման վտանգներին պատնեշելու շուրջ տարածաշրջանի կարևորագույն երկրներից մեկի՝ ՀՀ դերի կարևորությունը ներկայացվեց որպես առաջնային:

Չափազանց խորը մտորումների տեղիք տվեց Ջոնաթան Սթիլի զեկույցում նշված տեղեկատվությունը՝ ԱՄՆ, Իսրայել և Սաուդյան Արաբիա եռյակի կողմից Իրանը ռմբակոծելու նախապատրաստման վերաբերյալ: Ներկայացվեցին անառարկելի փաստեր խիստ գաղտնիության պայմաններում վերոհիշյալ եռյակի միջև ընթացող բանակցությունների մասին:

Մեծ աշխուժություն առաջացրեց եկող տարի Սլովակիայի նախագահական ընտրություններում հաղթանակելու ամենահավանական թեկնածու Շտեֆան Հարաբինի զեկույցը ԵՄ և Ռուսաստանի միջև սրված հարաբերությունների և խնդիրների շուրջ:

Բանախոսը հատուկ ընդգծեց Ուկրաինայի նախագահ Պ. Պորոշենկոյի «Կերչյան սադրանքի» մասին՝ այն որակելով որպես ԵՄ և Ռուսաստանի միջև պատերազմ հրահրելու խայտառակ փորձ: Խոսվեց նաև Սլովակիայի ներուժի մասին որպես կապող օղակ եվրոպական երկրների և Արևելյան Եվրոպայի՝ Ռուսաստանի, Բելառուսի և Հարավային Կովկասի երկրների միջև: Ի թիվս նշված հիմնահարցերի՝ քննարկվեցին նաև համաշխարհային քաղաքականությանը, տնտեսությանն ու գլոբալ անվտանգությանն առնչվող հիմնախնդիրներ:

Ղազախստանը ներկայացնող քաղաքագետ Արման Թեմիրջանովը հանդես եկավ Հայաստանի հետհեղափոխական խնդիրների վերլուծությամբ: Տրվեց բարձր գնահատական Հայաստանում իրականացված վարչակարգի փոփոխության, Սերժ Սարգսյանի հանցավոր կլանի և ձևավորված կոռուպցիոն համակարգի վերացման ու նոր հարաբերություններ կառուցելու փորձի շուրջ: Կոնֆերանսին ներկա էին նաև Սլովակիայում Չինաստանի Նորին Գերազանցություն դեսպան Լին Լինը, և տարբեր դիվանագիտական ներկայացուցչություններից կարևորագույն անձինք:

Կոնֆերանսի ավարտին կազմակերպիչների և մասնակիցների միջև ձեռք բերվեց պայմանավորվածություն՝ շարունակելու հասարակական-քաղաքական ու փորձագիտական հարթակում նախաձեռնված այս երկխոսությունը 2019թ. մարտ ամսին Ղազախստանի մայրաքաղաք Աստանայում նախատեսվող միջազգային ֆորումի շրջանակներում, որը կազմակերպում է «ՊԱՆԱՊ»-ը Ղազախստանի «Արևմուտք-Արևելք» կենտրոնի հետ համատեղ:

«ՊԱՆԱՊ»-ի մամլո քարտուղարություն
Բրատիսլավա