«Պիլասոս անողն» ու դեբատի տակ մնացածը ԱԺ Նախագահի պաշտոնի համար կռիվ են տալիս

Նոր խորհրդարանում «Իմ քայլը» դաշինքը կունենա բացարձակ մեծամասնություն՝ 88 մանդատ։

Սա Նիկոլ Փաշինյանին կտա հնարավորություն՝ ձևավորելու բացարձակ մեծամասնություն և Ազգային ժողովում անցկացնելու այն օրենքների նախագծերը, որոնք որ ցանկանում է, իսկ հաշվի առնելով, որ Կառավարությունը ևս իրենն է, ապա ակնհայտ է դառնում, որ օրենքի նախագծերն էլ կմշակվեն այնպես, ինչպես ինքն է ցանկանում։

Սա ժողովրդավարությունից միապետության անցման շատ կարճ և աշխարհում ընդունված տարբերակ է, սակայն հիշեցնենք, որ այդ տարբերակը շատ պետությունների համար եղել է, մեղմ ասած՝ կործանարար, իսկ կիսապատերազմական իրավիճակում գտնվող պետության համար կլինի առանց մեղմի՝ կործանարար։

Ազգային ժողովը լցնելով իր հետ քայլած կամ չոչ արած երիտասարդներով՝ Նիկոլ Փաշինյանն այնտեղ կկարգի նրանց գլխավորին՝ Ազգային ժողովի նախագահին, որը, բնականաբար, կլինի իր թիմից։ Արդեն իսկ շրջանառվում են մի քանի իմքայլականների անուններ։

Դրանցից առաջատարը Լենա Նազարյանն է․ մի պատգամավոր, որն իր պատգամավորական ողջ գործունեության ընթացքում այդպես էլ չկարողացավ հասկանալ՝ ինչի՞ համար է հայտնվել խորհրդարանում։

Լենա Նազարյանը պատգամավոր կարգվեց կամա թե ակամա, հանգամանքների բերումով, սակայն մեկ տարի մենք այդպես էլ նրա կողմից չտեսանք պատգամավորին վայել ելույթ կամ օրենսդրական նախաձեռնություն։

Իսկ եթե սրան ավելացնում ենք Լենայի ջախջախիչ պարտությունն Արփինե Հովհաննիսյանի հետ դեբատում, ապա հասկանում ենք, որ Ազգային ժողովում նազարյանական տեսակի նախագահությունը «խայտառակելու է ռեսպուբլիկան». օրենսդիր այդ կարևորագույն աթոռին նստելն ամեն մեկի խելքի բանը չէ։

Ազգային ժողովի նախագահի հաջորդ թեկնածուն «պիլասոս անող» առաջին փոխվարչապետ Արարատ Միրզոյանն է։ Սույն պաշտոնյան ևս իր պատգամավորության ընթացքում որևէ լուրջ գործով աչքի չընկավ։ Առաջին փոխվարչապետի պաշտոնում Արարատ Միրզոյանը շարունակում է նույն չաճած կադրը մնալ, աչքի է ընկնում միայն էժան տրյուկներով, կառավարության նիստերին ամեն պատեհ և անպատեհ առիթի մեջ ընկնելով ու դատարկաբանությամբ։ Միրզոյանի ակտիվությունն ինչպես իր թիմակիցներից բոլորի մոտ, աչքի է ընկնում միայն իրենց ֆեյսբուքյան էջում, օրակարգը նրանց էջում է, ոչ թե, ասենք, ԱՄՆ պաշտոնական այցելություն կատարելիս. հավանաբար բոլորս ենք հիշում Միրզոյանի խայտառակ և անօրակարգ այցն ԱՄՆ։

Եվ հիմա՝ այս մարդիկ շտապում են դառնալ պառլամենտական Հայաստանի կարևոր բարձրաստիճան պաշտոնյաները, և հարց է առաջանում՝ մի՞թե սա է այն չափման միավորը, որից Փաշինյանն այդպես էլ չի բարձրանում, և մի՞թե հնարավոր չէ պաշտոնի նշանակել գործից գլուխ հանող մարդկանց: Դեռ որքա՞ն է հեղափոխական Հայաստանում խրախուսվելու ոչ թե խելքը, այլ քայլելու ունակությունը:

NEWSPRESS.am