Մենք լինելու ենք ընդդիմություն, և հենց սա էլ լինելու մեր առաքելությունն ԱԺ-ում․ Անի Սամսոնյան

ՀՀ-ում կայացան ընտրություններ, որտեղ ՀՀ քաղաքացիները կարողացան իրենց ազատ կամարտահայտմամբ ձևավորել խորհրդարան։ Այդ մասին լրագրողների հետ զրույցում ասաց «Լուսավոր Հայաստան» կուսակցության պատգամավորի թեկնածու Անի Սամսոնյանը։

Նա, իհարկե, նկատում է, որ եղել են խախտումներ, բայց միևնույն ժամանակ ընդգծում է, որ այդ ընտրախախտումները եղել են իներցիայով, չիրազեկվածության պատճառով և, հաշվի առնելով, որ վերջին 20 տարվա ընթացքում նման արդար ընտրություններ չեն եղել, ուստի, Անի Սամսոնյանի գնահատմամբ, սա այն ընտրությունն էր, որի մասին երազել են։

Ինչ վերաբերում է իրենց զբաղեցրած դիրքին նոր ձևավորված խորհրդարանում, ապա նա հայտարարում է՝ ԼՀԿ-ն լինելու է ընդդիմություն։

«Մենք լինելու ենք ընդդիմություն, և հենց սա էլ լինելու մեր առաքելությունն Ազգային ժողովում»։

Անի Սամսոնյանը չի ընդունում այն քննադատությունները, թե իրենք չեն կարող լինել իրական ընդդիմություն, քանի որ եղել են ՔՊ-ի գործընկերը։

«Ինչպես մենք քննադատել են նրանց «Ելք» դաշինքի ներսում, այդպես էլ քննադատելու ենք հրապարակավ։ Այս առումով մենք որևէ կաշկանդվածություն չունենք։ Օրինակ բերեմ Երևանի ավագանիում մեր աշխատանքը, քանի որ քննադատելու առիթի ժամանակ մենք առանց կաշկանդվելու քննադատել ենք»,- ասաց Սամսոնյանը։

Նրա դիտարկմամբ՝ քանի որ այօրվա իշխանությունն ընտրվել է արդար ընտրություններով, ուստի նա իրականացնելու է իր առաքելությունը, սակայն չի կարող զերծ մնալ սխալներից ու բացթողումներից, իսկ այդ սխալները մատնանշողը լինելու է հենց ԼՀԿ-ն։