«Հայաթ» հյուրանոցում հայտնաբերվել է 33-ամյա տնօրենի դին, կա վիրավոր, հայտնաբերվել են ավտոմատ և արյունոտված դանակներ. Shamshyan.com (լուսանկարներ)

Այսօր՝ դեկտեմբերի 8-ին, ժամը 04։00-ի սահմաններում Երևանի 1-03 շտապօգնության բժիշկների հերթապահ խումբն ահազանգել է Ոստիկանության Երևան քաղաքի վարչության օպերատիվ կառավարման կենտրոն և հայտնել, որ կանչով մեկնել է Նոր Նորք վարչական շրջանի Գայի պողոտայի վերջնամասում գործող «Հայաթ» հյուրանոցային համալիր: Այնտեղ սենյակներից մեկում՝ հատակին, հայտնաբերվել է կնոջ դի։

Ինչպես հայտնում է Shamshyan.com-ը, ոստիկանները նշված հյուրանոցային համալիրի առաջին հարկում հայտնաբերել են Երևան քաղաքի Նոր Նորք վարչական շրջանի բնակիչ՝ 33-ամյա Անժելա Ի.-ի դին։ Դատաբժշկի նախնական եզրակացության համաձայն՝ վերջինը մահացել է ծնոտի մասում ստացած հրազենային վնասվածքից։

Մինչ ոստիկաններն ու քննիչները դեպքի վայրի զննություն էին կատարում, ժամը 04։50-ի սահմաններում «Սուրբ Գրիգոր Լուսավորիչ» բժշկական կենտրոնից ոստիկանության Նոր Նորքի բաժին ահազանգ է ստացվել, որ «աջ արմնկային շրջանի ծակած վերք» ախտորոշմամբ իրենց մոտ է տեղափոխվել մի քաղաքացի։

Ոստիկաններն ու քննիչները պարզել են, որ այդ քաղաքացին Երևան քաղաքի Նոր Նորք վարչական շրջանի բնակիչ՝ 33-ամյա Արթուր Ն.-ն է, ով հիվանդանոց է տեղափոխվել նշված հյուրանոցային համալիրից։

Նշված հյուրանոցային համալիրում հայտնաբերվել է «ԱԿՍ» տեսակի 5.45 մմ տրամաչափի հրազեն, 4 հատ կրակված և 1 հատ չկրակված պարկուճ և 2 հատ դանակ, որոնցից մեկը՝ խոհանոցային։

Առաջին հարկի մի քանի սենյակներում՝ թե հատակին, թե պատերին, արնանման հետքեր էին, իսկ այն սենյակում, որտեղ հայտնաբերվել է դին, պատերին առկա էր կրակոցի հետքեր։

Ըստ նախնական տեղեկությունների՝ տեղի ունեցածն ինքնասպանություն է եղել, որը պարզ կլինի մի շարք փորձաքննություններ կատարելուց հետո։

Դեպքի վայրում հավաքվածներն ասում էին, որ մահացածը նշված հյուրանոցային համալիրի տնօրենն էր։ 

Մանրամասները՝ սկզբնաղբյուր կայքում