Արցախի իշխանությունները Փաշինյանի թեթևամիտ և սադրիչ հայտարարություններին չպատասխանեցին, որովհետև ունեն բարձր պատասխանատվություն. Շահնազարյան

Նիկոլ Փաշինյանը փորձում է քաղաքական բանավեճն իջեցնել հայհոյանքի աստիճանի, դա շարքային սադրանք է, դա նրան չի հաջողվի: Այդ մասին այսօր լրագրողների հետ զրույցում ասաց Հանրապետական կուսակցության համամասնական ցուցակի 3–րդ համար Դավիթ Շահնազարյանը՝ անդրադառնալով Փաշինյանի այն հայտարարությանը, թե Սերժ Սարգսյանի ղեկավարած թիմը պատրաստվում էր Արցախը հանձնել Ադրբեջանին:

«Ես և իմ այսօրվա գործընկերները որևէ դեպքում չենք իջնի այդ մակարդակի, որովհետև փորձը քաղաքական բովանդակություն է, և քաղաքակիրթ քննարկումն իջեցնել հայհոյանքի աստիճանի, իշխանություններին չի հաջողվի: Այդ հայտարարությունը մի անգամ ևս վկայեց, որ ինքը բացարձակ հեռու է Արցախի հարցին տիրապետելուց: Եթե հիշում եք, նույնիսկ հայտարարեց, որ Սերժ Սարգսյանի իշխանության ժամանակ ես եմ բանակցել, այնպես որ՝ անիմաստ հայտարարությունը մեկնաբանելու կարիք չունեմ: Եթե ցանկանում են, ես նրանց հրավիրում եմ բանավեճի՝ հենց Արցախի հարցով՝ Նիկոլ Փաշինյանին, Արտգործնախարարին կամ որևէ մեկին, ով կհայտարարի, որ այդ հարցում ներկայացնում է ներկայիս կառավարությունը»: 

Անդրադառնալով Փաշինյանի երեկվա հայտարարությանը, որով Փաշինյանն Արցախի իշխանություններին սթափվելու ևսեփական աշխատանքով զբաղվելու կոչ էր  անում, Շահնազարյանը պատասխանեց. «Ես չեմ ուզում որեւէ ածական օգտագործել, բայց կարծում եմ, որ դա իմպուլսիվ հայտարարություն չէր, դա բավական լավ մշակված էքսպրոմտի տեսքով ներկայացված հայտարարություն էր և դա նույն շղթայում է, ինչը որ սկսվեց Սասուն Միքայելյանի հայտարարությունից: Դուք ինքներդ համոզվեցիք, որ Արցախի Հանրապետության ղեկավարությունը բավական սառնասիրտ է, և այդ թեթևամիտ և շատ սադրիչ հայտարարություններին պատասխան չեղավ, որովհետև այն փորձը, որ նա արդեն կատարում է իր թիմի հետ, նպատակաուղղված է ստեղծել հրապարակային բանավեճ, հրապարակային հակադրություն Արցախի իշխանությունների հետ: Արցախի իշխանությունները նման սադրանքի, իհարկե, չեն տրվի, որովհետև ի տարբերություն ներկայիս իշխող վարչախմբի՝ նրանք ունեն բարձր պատասխանատվություն»:

Շահնազարյանը վերջում հավելեց, որ Հայաստանի անկախության ընթացքում որևէ մեկը երբեէ այդ ձևով ու տոնայնությամբ չի խոսել Արցախի իշխանություններին, այլ Արցախի որևէ քաղաքացու չէր դիմել: