Միայն բարերարությամբ երկիր չես պահի․ մենք ուզում ենք, որ մեր երեխաները լավ ապրեն․ Ծառուկյանը Սիսիանում էր (ֆոտո, վիդեո)

«Բարգավաճ Հայաստան» կուսակցության նախագահ Գագիկ Ծառուկյանն իր կուսակիցների հետ, քարոզարշավի շրջանակում հանդիպեց Սիսիանի բնակիչների հետ։ Նրա հետ էր նաև այս ընտրատարածքում առաջադրված պատգամավորի թեկնածու Նաիրա Զոհրաբյանը։

Գագիկ Ծառուկյանն իր խոսքում նկատեց, որ այսօր շատերն են ուզում արտերկրից վերադառնալ Հայաստան, բայց գոնե այս պահին այստեղ ապագա չեն տեսնում։

«Ասում ա՝ Ծառուկյան ջան, ուզում եմ գամ, բայց գամ՝ ի՞նչ անեմ, ո՞նց ապրեմ, ո՛չ աշխատանք կա, ո՛չ էլ տուն ունեմ, տունս ծախել, գնացել եմ․․․ հիմա պետք է այնպես անենք, որ բոլորն էլ կարողանան տուն առնել։ Չեմ ասում, թե պետությունը ձրի տալու է տներ, բայց գոնե այնպիսի տոկոսներով հիպոտեկներ լինեն, որ, օրինակ, 65000 դրամ ստացող մարդը կարողանա իր աշխատավարձից տուն առնել»։

Նա նկատեց, որ ինքն էլ ոչ մի բան չի ունեցել և դժվարությամբ է հասել նրան, ինչ ունի։ Հիմա թեև ոչ մի բանի կարիք չունի իր ընտանիքը, սակայն ժողովրդի համար պատրաստ է ամեն ինչի։

«Եթե մենք պետություն ենք, ժողովրդի մասին մտածում ենք, ուրեմն՝ այդ բոլորը պետք է քայլ առ քայլ կատարենք»։

ԲՀԿ առաջնորդն ասաց, որ իր թիմակիցներին զգուշացրել է որևէ վիրավորական խոսք չհնչեցնել մյուս ուժերի գործիչների հասցեին.

«Իմ թիմակիցներին և ամենաշատը Նաիրա Զոհրաբյանին, որի լեզուն գիտեք, ասել եմ՝ տիկին Զոհրաբյան, բոլոր քաղաքական գործիչների հանդեպ շատ ուշադիր կլինեք, որևէ վիրավորական խոսք ասելու իրավունք չունեք։ Մարդն իր ծրագիրը թող ներկայացնի։ Բայց նաև խոստանում եմ, որ եթե մեր մասին վատ արտահայտվեն, այն ժամանակ էնպիսի բաներ կհրապարակեն էդ ասողի մասին, որ չի իմանա՝ ոնց եղավ»,- ասաց Ծառուկյանը։

Նա սիսիանցիներին կոչ արեց ճիշտ ընտրություն կատարել և նկատեց, որ ինքը միշտ կանգնած է ժողովրդի կողքին ու պաշտոնն իր համար չի ուզում, այլ նրա համար, որպեսզի պետական լծակներ ունենա ժողովրդին էլ ավելի շատ օգնելու համար։

«Ես առանց պաշտոնի էլ բարերարարություն անում եմ իմ անձնականից, բայց բարերարությամբ երկիր չես պահի»,- ասաց Ծառուկյանը։

Տեսանյութը՝ առաջիկայում