Բա որ Ծռերը «շշկռվեն» կամ որը կլինի հաջորդ պաշարվելիք օբյեկտը

Ազգային ժողովի արտահերթ ընտրությունների քարոզարշավի առաջին իսկ օրն ի հայտ եկան «Սասնա Ծռեր» կուսակցության և վարչապետի պաշտոնակատար Նիկոլ Փաշինյանի միջև տարաձայնությունները, որոնց մասին ամիսներ շարունակ խոսում է մամուլը։

Ազգային ժողովի դիմաց իր քարոզարշավն իրականացնող՝ «Ծռերի» պատգամավորի թեկնածու Վարուժան Ավետիսյանն այսօր հայտարարեց, որ այս խորհրդարանը ընտրվելու է երկու տարի ժամկետով և լինելու է անցումային խորհրդարան։

«Ազգային ժողովը երկու տարի հետո պետք է ամփոփած լինի իր անցումային անելիքը, որից հետո նոր պետք է լինեն արտահերթ նոր ընտրություններ, երբ նոր ձևավորված կուսակցությունները կկարողանան մասնակցել ընտրություններին և խորհրդարանում ներկայացնել ժողովրդի իրական կամքը»,- ասաց Ավետիսյանը։

Վերջինս, թերևս, ճշմարիտ է մի բանում․ այս խորհրդարանը ևս, ինչպես նախորդը, չի արտահայտելու ժողովրդի իրական կամքը, քանի որ ժողովրդի կամարտահայտությունն արտահայտող շատ կուսակցություններ պարզապես հնարավորություն չունեցան մասնակցելու ընտրություններին, քանի որ Փաշինյանը դրանք որոշեց կազմակերպել ափալ-թափալ, քանի դեռ իր վարկանիշն օդ չի ցնդել։

«Սասնա Ծռեր»-ի առաջարկած անցումային խորհրդարանից վտանգ զգալով՝ այս թեզին շտապեց պատասխանել Նիկոլ Փաշինյանը՝ նշելով, որ խորհրդարանը երկար կյանք է ունենալու։

«Էդ դուք իրոք որոշե՞լ եք, որ ձեզ իրավունք է տրված որոշել խորհրդարանի ու երբեմն նույնիսկ մարդկանց կյանքի չափե՞րը: Ես ձեզ ասում եմ՝ հանկարծ չշշկռվեք, սա ձեզ համար Սերժ Սարգսյանի թուլամորթ ու թուլակամ իշխանությունը չէ»,- հայտարարեց Նիկոլ Փաշինյանը։

Դե, բնականաբար, Փաշինյանին ձեռնտու չէ՝ երկու տարի անց կրկին խորհդարանական ընտրություններ կազմակերպելը, որովհետև հազիվ է կարողանալու այս անգամ իր անտաղանդներին Ազգային ժողով գործուղել, երկու տարի անց դա ինչպե՞ս նրան կհաջողի․ չէ՞ որ Փաշինյանը շատ լավ էլ գիտակցում է, որ օր առ օր են տապալում երկրում ամեն ինչ՝ մսխելով նախորդներից ձեռքբերածը։

Հետևաբար, նորմալ է, որ Փաշինյանին նյարդայնացնում են «Ծռերը», իսկ որ ամենավտանգավորն է՝ գուցե «Ծռերին» սկսի նյարդայնացնել Փաշինյանը։

Իսկ ի՞նչ է սպասում զինված ապստամբության մասնագետներին այդ ժամանակ, կամ ինչպես են արտահայտելու իրենց դժգոհությունն օրվա իշխանությունից․ նախորդ անգամ դա արտահայտվեց զինված ապստամության տեսքով և արժեցավ երեք հայորդու կյանք․ իսկ հիմա՞։

Այս համատեքստում ուշագրավ է նաև Արցախի հարցում «Սասնա Ծռերի» հնչեցրած մտահգությունը։ Ասում են, որ գալիս են հարցեր լուծելու և կանխելու ցանկացած փորձ՝ հայ ժողովրդի տարածքները հանձնելու հետ կապված։

Հետաքրքիր է՝ իսկ ո՞վ է այդ տարածք հանձնողը, կամ ինչ կլինի, երբ «Ծռերը» «շշկռվեն»...

NEWSPRESS.am