Մշակույթի նախարարությունում իրավիճակ չի փոխվել. բանաստեղծի բաց նամակը՝ Մակունցին

Մշակույթի նախարարի պաշտոնակատար Լիլիթ Մակունցին ու ԿԳ նախարարի պաշտոնակատար Արայիկ Հարությունյանին բաց նամակ է  ուղղել Հայաստանի գրողների միության անդամ, բանաստեղծ Նորայր Գրիգորյանը:

Նամակում, մասնավորապես, ասված է.

«Վեց ամիս շարունակ Դուք հանրությանը փորձում եք ապացուցել, որ մշակույթ կրող էություն եք: Բնականաբար, համոզել նաև, որ մշակույթի նախարարությունը մշակութային արժեքներ դավանող կառույց է: Նույնքան ժամանակ հանրությունը լավատեսորեն ուզում է ճշմարտության հատիկներ գտնել Ձեր ասածներում:

Չգիտեմ, ինչքանով եք Դուք ապացուցել, որ այդպիսինն եք, չգիտեմ, ինչքանով է հանրությունը համոզվել, որ այդպիսինն եք, սակայն վերջերս մասնակցելով Ձեր և կրթության նախարարության կողմից հայտարարված «Արվեստը դպրոցում» դրամաշնորհային ծրագրին/մրցույթին/, իմ մեջ կասկած առաջացավ Ձեր արվեստասեր էության վերաբերյալ, որովհետև նախկինում չվստահելով այդ նախարարության թափանցիկ գործունեությանը, երբևէ չեմ փորձել մասնակցել նման շոուների, որի արդյունքում հաղթողի դափնուն են արժանացել ինչ- որ կառույցի շուրջ խմբավորված մարդիկ:

Այս անգամ որոշեցի մասնակցել՝ մտածելով՝ երկրում իրավիճակ է փոխվել, սակայն տեսա, որ սովետիզմի և նախորդ իշխանության թողած հետևանքների մեջ դեռ խարխափում են երկրի ամենալուսավոր կառույցները: Որովհետև՝

ա/Մշակույթի նախարարության կայքում մրցույթի վերաբերյալ հայտարարությունում ընդգծված է՝ պետական կառույցներում աշխատող հայտատուները չեն կարող մասնակցել մրցույթին: Կարծում եմ, հաղթող ճանաչված հիսուն հոգանոց ցուցակում նրանք չեն բացառվում:

բ/մրցույթի բանավոր փուլին հանձնաժողովը /իսկ հանձնաժողով նշանակում է մեկից ավել մարդկանց խումբ/ այդ չափանիշը չի պահպանել:

դ/մրցույթի արդյունքում կա հաղթող, ով չի ներկայացրել հայտ, ծրագիր, չի ներկայացել մրցույթի բանավոր փուլին, ավելին՝ բացակայել է երկրից, բայց արդյունքում ճանաչվել է հաղթող:

ե/իմ հարցազրույցից հետո հանձնաժողովը տեղեկացրեց, որ արդյունքների մասին տեղյակ կպահեն դեկտեմբերի վերջին, սակայն մրցույթի ավարտի,արդյունքների մասին տեղեկատվությունը եւ հաղթողների խառնիցրիվ ցուցակը նախարարության կայքում տեղադրվեց նոյեմբերի 20-ին:

զ/ամենազավեշտը՝ հաջորդ օրը կայքից հանվեց հաղթողների ցուցակը, տեղը տեղադրվեցին լուսանկարներ՝ իբր կրթության և մշակույթի նախարարներն այցելել են դպրոց և մասնակցել «Իմ արվեստը դպրոցում» առաջին դասին:

է/մյուս զավեշտը՝ դեկտեմբերի 22-ին կայքից անհետացավ նաև մրցույթի արդյունքների վերաբերյալ տեղեկատվությունը:

հ.գ.

Ինչո՞ւ եք կասկածի տակ դնում քայլող, ճանապարհներ փակող, միտինգներից տուն չգնացող մարդկանց, նաեւ մտավորականներիս, վերջիվերջո թավշյա հեղափոխության առաջնորդ Նիկոլ Փաշինյանի հայացքները, այն էլ՝ համապետական ընտրություններից օրեր առաջ»: