Դեկտեմբերի 9-ի գիշերը Նիկոլ Փաշինյանին սպասվում է մեծ անակնկալ. Արմեն Աշոտյան

Հիշո՞ւմ եք՝ վարչապետն ԱԺ ամբիոնից հայտարարեց, որ Հանրապետականը 0 ձայն է ստանալու ընտրություններում: Այդ մասին լրագրողներին հարցրեց Հանրապետական կուսակցության փոխնախագահ Արմեն Աշոտյանը՝ կուսակցությանը ծրագիրը ներկայացնելու ժամանակ: 

«Կարծում եմ՝ նման ձևակերպումները նախ և առաջ անարգանք են ՀՀ քաղաքացիների հանդեպ: Ակնհայտ է, որ մենք 0 ձայն չենք ստանալու, մենք ստանալու ենք հազարավոր ձայներ, տասնյակ հազարավոր ձայներ: Եվ եթե անգամ մենք չանցնենք խորհրդարան, այդ տասնյակ հազարավոր քաղաքացիները ՀՀ անձնագիրը կրող, ՀՀ լիարժեք քաղաքացիներ են»,- ասաց Աշոտյանն ու հավելեց, որ «կեղծ դեմոկրատական» իշխանություններն ի սկզբանե այդ մարդկանց հանում են իրականությունից, և այն մարդիկ, ովքեր համաձայն չեն իրենց հետ, դարձել են քննադատության թիրախ: 

Աշոտյանը նշեց, որ իր ընտրատարածքում ինքը բազմաթիվ դեպքեր գիտի, երբ մարդիկ  խուսափում են Հանրապետականի հետ ակնհայտ առնչություն ունենալուց. «Մարդիկ սկսել են վախենալ կարծիք հայտնելուց: Մարդիկ, ում հետ ես խոսում եմ, ասում են՝ Արմեն ջան, շտաբեր չբացես, չենք գալու, բայց ձայները տալու ենք ձեզ, չենք գալու, որովհետև չենք ուզում հայտնվել ուշադրության կենտրոնում, չենք գալու, որովհետև չենք ուզում աշխատանքը կորցնել, չենք գալու, որովհետև չենք ուզում մեր գալուց հետո մեր տուն մարդ այցելի ու ասի՝ ինչո՞ւ ես գնացել Աշոտյանի կամ Հանրապետականի շտաբ: Բայց այդ մարդիկ շատ են, ու Նիկոլ Փաշինյանին անձամբ ու իր թիմին դեկտեմբերի 9-ի գիշերը սպասում է մեծ անակնկալ»:

ԱԺ փոխնախագահ Արփինե Հովհաննիսյանն իր հերթին հավելեց՝ չափազանց կարևոր է, որ Նիկոլ Փաշինյանն ու թիմն իրենք իրենց իդենտիֆիկացնեն որպես իշխանություն, իրենք այլևս ընդդիմություն չեն. «Իրենք իշխանություն են ու պատասխանատվություն են կրում բոլորի համար՝ Հանրապետականի համար, ինձ համար, Աշոտյանի համար, մեր ընտրողների համար, իրենք նրանց լավ կյանքի համար էլ են պատասխանատու: Իրենք պատասխանատու են նրանց համար, ովքեր ձայն են տալու Հանրապետականին, Դաշնակցությանը, ԲՀԿ-ին»: