Ամեն մարդ ընտրելուց առաջ թող մտածի՝ նրան, ում ընտրում է, ուղղակի ձայն փախցնո՞ղ է, թե՞ խնդիրներ լուծող․ Մարկոս Հարությունյան

Երևանի ավագանու անդամ Մարկոս Հարությունյանը «Բարգավաճ Հայաստան» կուսակցության կողմից թիվ 2 ընտրատարածքում (Աջափնյակ, Դավիթաշեն, Արաբկիր 11/7) ռեյտինգային ընտրակարգով առաջադրվել է պատգամավորի թեկնածու։

Մարկոս Հարությունյանը NEWSPRESS.am-ի հետ զրույցում նկատում է, որ Աջափնյակ վարչական շրջանի խնդիրները բազմաթիվ են և վստահ է, որ պատգամավոր ընտրվելու դեպքում՝ իրեն կհաջողվի ԱԺ-ում վեր հանել այդ խնդիրները։

«Մինչ օրս ԱԺ ամբիոնից ոչ մի պատգամավոր Աջափնյակի խնդիրների մասին չի խոսել, ու ոչ մի խնդիր չի լուծվել, մինչդեռ դրանք շատ են ու վաղուց լուծման կարիք ունեն»,-ասում է Մարկոս Հարությունյանը։

Նա նկատում է, որ իր համար կարևոր է նաև միշտ լինել հասանելի ժողովրդին, ինչն իր պարտավորությունն է համարում։ Բացի այն, որ պաշտպանում է ԲՀԿ նախընտրական ծրագիրը, որն ամբողջությամբ ուղղված է ի շահ ժողովրդի բարօրության ու ապրելակերպի բարելավման, Մարկոս Հարությունյանը՝ որպես Աջափնյակ համայնքի ապագա պատգամավոր, իր առջև դրել է նաև այդ խնդիրների լուծումն ու արդեն, ըստ առաջնահերթության, ցանկ է կազմել։ Դրանցից առաջինը սեփականաշնորհման հարցն է։

«Աջափնյակի պետական շենքերի բնակիչների 10 տոկոսը, սեփական սեկտորի բնակիչների 30 տոկոսը սեփականության վկայական չունի։ Մարդիկ ավելի քան 30 տարի ապրում են նույն տան մեջ ու սեփականության վկայական չունեն։ Սա առաջնային հարցերից մեկն է։ Այս հարցը լուծելու դեպքում՝ մարդիկ կդառնան հարկատու, իսկ պետությունն էլ կպարտավորվի վկայականով ապահովել նրանց ու կատարել իր պարտավորությունները»,- ասում է պատգամավորի թեկնածուն։

Նա նկատում է, որ խնդիրներն այնքան շատ են, որ դրանց մասին անընդհատ կարելի է խոսել ու թվարկել, բայց ավելի կարևորն այս պարագայում նաև այն է, որ Մարկոս Հարությունյանը գիտի այդ բոլորի մասին, ու նաև ապահովված է կապը համայնքի բնակիչների հետ, ովքեր բարձրաձայնում են այդ խնդիրների մասին։

«Պատգամավորը նա է, որ միշտ ժողովրդի հետ է, ժողովրդի կողքին ու նրա խնդիրն իր խնդիրն է։ Ես գիտեմ, թե այսօր ինչ է պետք անել Աջափնյակում, գիտեմ՝ ինչպես շփվել ժողովրդի հետ ու ինչպես օգնել նրանց՝ իրենց խնդիրները լուծել։ Նրանք էլ գիտեն ինձ ու վստահ են՝ եթե խնդիրը ներկայացրին, ապա այն արագ լուծում է ստանալու»։

Մարկոս Հարությունյանը Երևանի ավագանու ընտրությունների ժամանակ արդեն խոստացել էր, որ ակտիվ ավագանի է լինելու և իր ընտրողներին հուսախաբ չի արել։ Ասում է՝ արված գործերի մասին շատ կարող է խոսել, բայց դրանց մեջ առանձնացնում ու կարևորում է մի քանիսը։ Մարկոս Հարությունյանը կարևորում է հատկապես Աջափնյակի մանկապարտեզներում հացի մատակարարման հետ կապված խնդրի լուծումը։

«Մոտ 3 տարի մանկապարտեզներին անորակ հաց էին մատակարարում։ Բազմաթիվ բողոքներ են եղել ծնողների կողմից։ Ես էլ հացի նմուշը և որոշ լուսանկարներ ներկայացրի քաղաքապետարան։ Անմիջապես ուսումնասիրություններ կատարվեցին, և մատակարարին այլևս թույլ չտվեցին մանկապարտեզները սպասարկել»,- ասում է Մարկոս Հարությունյանը և նկատում, որ դա կարևոր քայլ էր, քանի որ մանկապարտեզների սննդից, փաստորեն, օգտվում են համայնքի բոլոր երեխաները։

Պատգամավորի թեկնածուն առաջիկայում էլ խոստանում է լինել համայնքի բնակիչների հետ, լսել նրանց ու օգնել, հատկապես որ ինքը միշտ հասանելի է։

«Բոլորը գիտեն՝ որտեղ եմ ապրում, ես ամեն օր ոտքով եմ գնում աշխատանքի ու տուն գալիս, այնպես որ՝ բոլորը գիտեն՝ ինչպես գտնել ինձ ու ես առաջ քաշած խնդիրներին արձագանքում եմ՝ ըստ առաջնահերթության»,- ասում է նա։

Մարկոս Հարությունյանը նաև իր կոչն է ուղղում հասարակությանը՝ չխաբվել և ճիշտ ընտրություն կատարել։ Նա նկատում է, որ հիմա էլ առաջադրված թեկնածուներ կան, ովքեր նախկինում էլ եղել են պատգամավորներ՝ խոստումներ են տվել, ընտրվել, բայց գործ չեն արել կամ էլ նույնիսկ իրենց մանդատը չեն վերցրել։

«Ամեն մարդ ոչ թե պետք է հավատա միայն խոստումներին, այլ պետք է նայի թեկնածուի անցած ճանապարհին ու հավատա իր սրտի ձայնին։ Ամեն մարդ ընտրելուց առաջ թող մտածի՝ նրան, ում ընտրում է՝ ուղղակի ձայն փախցնո՞ղ է, թե՞ խնդիրներ լուծող։ Թող ոչ մեկի ձայնն անարդյունավետ չլինի: Եթե մենք բոլորս միասնական լինենք, ոչ մի խնդիր չի մնա չլուծված»։

Զրուցեց՝ Արմինե Մկրտումյանը