էդ ի՞նչ ա՝ խոպանչի, արժանապատիվ անուն տվեք. Փաշինյանը չգիտի՝ «խոպանչուն» արժանապատիվ աշխատանք է պետք, ո՛չ թե անուն

Ինձ մնում է միայն հիանալ Ձեր ելույթով՝ հարց, պատասխան, դատապարտում, քաջալերանք. ամեն ինչ կար Ձեր հարցի մեջ:

Վարչապետի ժ/պ Նիկոլ Փաշինյանը, այսպես հումորով արձագանքեց լրագրողի հարցին, որը վերաբերում էր մեծ աղմուկ բարձրացրած ՊԵԿ որոշմանը, ըստ որի՝ տրանսֆերտները կարող են 23% հարկվել:

Փաշինյանը հղում անելով ՊԵԿ-ի պարզաբանմանը՝ նկատեց, որ այդպիսի բան չկա:

«Չի կարող մարդը մի տեղ հարկվել, հետո գա, Հայաստան մտնելիս հարկվի, հետո իր բնակավայր մտնելիս, հետո տնից դուրս գա՝ մի հատ էլ էդտեղ հարկվի, հետո նորից, որ գնա, մի հատ էլ էդտեղ հարկվի: Ինչպե՞ս եմ վերաբերվում այս համակարգի՞ն, նման համակարգ չկա Հայաստանում և չի կարող լինել»,-ասաց Փաշինյանը, ըստ էության պատասխանելով հենց իր առաջ քաշած հարցին՝ քաղաքացու ամենուր հարկվելու վերաբերյալ: Իհարկե, նման համակարգ չի կարող լինել, քանի որ դա արդեն ծայրահեղ ապուշություն կլիներ, սակայն հարկ է նկատել, որ լրագրողի տված հարցը, ոչ թե քաղաքացու տանը, դրսում, քայլելիս ու նստելիս հարկվելու մասին էր խոսքը, այլ հենց ՊԵԿ-ի որոշման: Այն է՝

«2020 թվականից շրջանառության մեջ դնել մեխանիզմ, ըստ որի՝ հարկային դաշտ կբերի արտագնա աշխատանքի մեկնածներին․ դրսից եկամուտ ստացող քաղաքացին կպարտավորվի այն հայտարարագրել ու դրա 23 տոկոսը, որպես եկամտային հարկ, վճարել պետությանը»:

Տրանսֆերտների հարկմամբ ՊԵԿ-ն ակնկալում է կտրուկ ավելացնել բյուջեի մուտքերը: Ու թեև ՊԵԿ-ն այս հայտարարությունից հետո մեկ անգամ ևս հստակեցրել է այս հարցում իր դիրքորոշումն ու հաստատել այն, սակայն Նիկոլ Փաշինյանին հաջողվեց շրջանցել այս հարցի բուն պատասխանը՝ սեփական մեկնաբանմամբ ներկայացնելով հարցը:

Իսկ երբ լրագրողը փորձեց հստակեցնել, թե «այսինքն՝ խոպանչիները չե՞ն հարկվելու», Փաշինյանը փոխանակ կենտրոնանալու պատասխանի վրա, կառչեց «խոպանչի» բառից, ու կենտրոնացավ հենց դրա վրա:

«Կներեք, էդ ի՞նչ բառ ա՝ խոպանչի, էդ բառը էս երկու օր ա՝ ի պաշտպանություն բոլորն օգտագործում են: Նախ, էդ մարդկանց խնդրում եմ արժանապատիվ անուն տվեք, հետո նոր նրանց իրավունքները պաշտպանեք»,- հորդորեց Փաշինյանը:

Չմեկնաբանենք, իհարկե, որ այդ մարդկանց վրդովվեցնում է ո՛չ թե «խոպանչի» բառը, այլ ծաղրը՝ իրենց աշխատանքի ու եկամտի նկատմամբ: Եվ նրանք դեմ չեն «խոպանչի» լինել, եթե հայրենիքում «արժանապատիվ» գործ գտնեն:

Նա ևս մեկ անգամ կրկնեց, որ այդպիսի նախագիծ և հայեցակարգ չկա ու փորձեց բացատրել, թե խոսքն ինչի մասին է, բայց անմիջապես էլ կարծես փոշմանեց.

«Խոսքը.... ընդհանրապես մենք ասել ենք՝ ուղիղ ժողովրդավարական կառավարություն ենք, և մեր ընկալումն այն է, որ չի կարող հարկային բեռի ավելացում լինել՝ առանց ժողովրդի քաջալերանքի և մանդատի»,- ասաց Փաշինյանն ու նկատեց, որ այդ նախագիծը չի քննարկում:

Երբ «Ամերիկայի ձայնը» ՀԸ-ի լրագրողը ցանկացավ հավելյալ պարզաբանում՝ հարցի հետ կապված, Փաշինյանը չսպասեց հարցին և անմիջապես պատասխանեց, թե հայեցակարգով առաջարկվում է մտցնել համընդհանուր հայտարարագրման համակարգ և 23 տոկոս եկամտային հարկով հարկել դրսից ուղարկած գումարները, «բայց դա չի նշանակում, որ ով հայտարարագիր է ներկայացնում՝ պետք է հավելյալ հարկվի... բայց, ընդհանուր առմամբ չկա գաղափար, որը չքննարկվի»:

Փաշինյանը նաև նկատեց, որ, ընդհանուր առմամբ, պետական եկամուտները պետք է ձևավորվեն հարկերի հաշվին և օգտագործվեն կարիքների համար: