Աստվա՛ծ, խելք տուր այս մարդկանց

Հայաստանի իշխանությունների իրավական անգրագիտության արդյունքում ՀԱՊԿ գլխավոր քարտուղարի հետկանչն ու դրանից բխող խնդիրները սպառնում են պատուհաս դառնալ ՀՀ արտաքին քաղաքականության ու այսքան տարիների աշխատանքի արդյունքում ձեռք բերված պայմանավորվածությունների գլխին:

Պարզվում է՝ Բելառուսի նախագահ Ալեքսանդր Լուկաշենկոն ՀԱՊԿ-ում ստեղծված իրավիճակը քննարկել էր կազմակերպության ոչ անդամ երկրի՝ Ադրբեջանի դեսպանի հետ: Իսկ Աստանայում կայացած գագաթնաժողովից հետո Ղազախստանի նախագահ Նուրսուլթան Նազարբաևը լրագրողներին հայտնել էր, որ Հայաստանն ուզում է պահպանել գլխավոր քարտուղարի պաշտոնը, սակայն ժամկետի ավարտին մեկ տարի է մնացել, և, իր կարծիքով, նոր գլխավոր քարտուղարը (եթե այն Հայաստանից լինի) մեկ տարվա ընթացքում չի հասցնի նույնիսկ բոլոր երկրներն այցելել։

Բելառուսի նախագահն ակնհայտորեն ծաղրել էր Հայաստանին ու հայտարարել էր, թե կազմակերպության հաջորդ ղեկավարը պետք է լինի Բելառուսից՝ ընդգծելով՝ ինքը ոչ թե մեկ, այլ երեք թեկնածու ունի այդ պաշտոնում. «Հայաստանը գլխավորում է Եվրասիական տնտեսական միությունը և Հավաքական անվտանգության պայմանագրի կազմակերպությունը: Սա շատ մեծ ծանրաբեռնվածություն է մի երկրի համար, որը գտնվում է այսպիսի անցումային փուլում: Արդյո՞ք Հայաստանը կդիմանա այդ ծանրությանը»,–ասել էր Լուկաշենկոն:

Նիկոլ Փաշինյանն, անդրադառնալով Բելառուսի նախագահի ու Ադրբեջանի դեսպանի հանդիպմանը, որտեղ Լուկաշենկոն մանրամասներ էր պատմել ՀԱՊԿ նիստից, ասել է․ «Դա դռնփակ ֆորմատով տեղի ունեցած նիստ է, որտեղ ռազմաքաղաքական դաշինքի ղեկավարները քննարկում են անցկացնում, դա փակ խոսակցություն է դաշնակիցների միջև: Եվ ես զարմացած եմ, որ 30 տարի նախագահի կարգավիճակում եղած մարդը կարող է իրեն այդպիսի քայլ թույլ տալ, և ես, իհարկե, պիտի պարզաբանումներ պահանջեմ Բելառուսի նախագահից և ոչ միայն նրանից: Մեր պայմանավորվածություններին հակասող հայտարարություն է արել նաև Նուրսուլթան Նազարբաևը՝ նիստից հետո հայտարարելով, որ ՀԱՊԿ գլխավոր քարտուղարի պաշտոնում նշանակվելու է Բելառուսի ներկայացուցիչ»:

Բելառուսի ԱԳՆ մամուլի քարտուղար Անատոլի Գլազն էլ մեկնաբանել է Նիկոլ Փաշինյանի հայտարարությունը և նշել. «Երևի Հայաստանի վարչապետի պաշտոնակատարն իրեն միջազգային դատախազի տեղ է դրել, որը պատժելու կամ ներելու լիազորություններ ունի»:

ԱԳՆ ներկայացուցիչն ասել է, որ «դա կարող է կիրառվել ՀԱՊԿ-ի նախկին գլխավոր քարտուղար, ՀՀ քաղաքացի Յուրի Խաչատուրովի դեպքում, բայց միջպետական հարաբերություններում գոյություն ունեն արարողակարգի ու էթիկետի հստակ նորմեր»։ Փաստորեն, ՀՀ-ին մեղադրում են արդեն էթիկական նորմերին չտիրապետելու մեջ, ինչին կհաջորդի մեղադրանքների նոր փաթեթ, ուստի՝ կանգնած ենք ՀԱՊԿ-ում լուրջ թշնամիներ ձեռք բերելու խնդրի առաջ, իսկ որ ամենավատն է՝ ՀԱՊԿ ի այլընտրանքը չունենք:

NEWSPRESS.am