«Սերժ Սարգսյանն իր տեղում է»

«ՀՀԿ ցուցակում մարդիկ են, ովքեր ազգային արժեքային համակարգի կրող են, ում համար արցախյան հարցի հայանպաստ լուծումը գերխնդիր է, Հայոց ցեղասպանության միջազգային ճանաչումը գերխնդիր է, ովքեր մտահոգված են Արցախի ապագայով, ազգային արժեքների պաշտպանմամբ, ազգային ավանդական ընտանիքի պահպանմամբ, ովքեր մտահոգված են առկա մարտահրավերներով և ՀՀ և Արցախի առաջ ծառացած կարևոր մարտահրավերների վերաբերյալ ունեն միևնույն ընդհանուր տեսլականը»։

Այս մասին հայտարարեց ՀՀԿ խոսնակ Էդուարդ Շարմազանովը՝ լրագրողների հետ հանդիպման ժամանակ։ Նա նշեց նաև, որ թեև Սերժ Սարգսյանն ընդգրկված չէ իրենց ցուցակում, սակայն նա իր տեղում է։

«Երկու օր առաջ եմ տեսել Սերժ Սարգսյանին»,-ասաց Շարմազանովը։

Պատասխանելով լրագրողի հարցին՝ ՀՀԿ խոսնակը բացատրեց, թե ինչու է «Իմ քայլը» դաշինքի ցուցակն անվանում աջաբսանդալ.

«Այդ ցուցակում ես տեսել եմ շատ մարդիկ, այդ թվում՝ լրատվական դաշտից ու քաղաքացիական հասարակությունից, ովքեր կուրծք էին ծեծում, որպեսզի Հայաստանը դուրս գա ՀԱՊԿ-ից ու ԵԱՏՄ-ից, ովքեր Հայաստան-Ռուսաստան դաշնակցային հարաբերությունների ամենախիստ քննադատներն էին: Իսկ այսօր նրանց առաջնորդ Փաշինյանը դարձել է Ռուսաստանի և Հայաստանի ջերմ հարաբերությունների երկրպագուն, որը շատ լավ է, դարձել է ՀԱՊԿ ու ԵՏՄ պաշտպանը»,- նկատում է ՀՀԿ–ական պատգամավորը: 

Այս առումով Շարմազանովի համար ընկալելի չէ՝ ինչպիսի դիրքորոշում ունեն այն մարդիկ, ովքեր ընդգրկված են ցուցակում։

«Այդ մարդիկ գտնում են, որ ԵԱՏՄ-ն չարի՞ք է, ՀԱՊԿ-ը չարի՞ք է, Ռուսաստա՞նն է մեղավոր Հայաստանի հետ կապված բազմաթիվ խնդիրներում, թե՞, ինչպես Նիկոլ Փաշինյանը, այնպես էլ իրենք, հեղափոխությունից հետո, փոխել են իրենց կարծիքը: Դրա համար ասում եմ՝ աջաբսանդալ»,- հավելեց Շարմազանովը։