«Թավշյա հեղափոխություն» պետք է անել ՀՀ կառավարության տնտեսական բլոկում

Հայաստանն ամեն օր տնտեսական դեգրադացիայի է ենթարկվում։ Այդ մասին ֆեյսբուքյան իր էջում գրել է «Կասեցում» քաղաքացիական շարժման համակարգող Սամսոն Գրիգորյանը։

Նա մասնավորապես գրել է․

«Լավ, շատ հեռվից չգամ, որպեսզի չխճճվեք թվերի մեջ, սկսենք Հայաստանի ԵԱՏՄ-ին անդամակցությունից (պաշտոնապես 02.01.2015թ): Այդ օրվանից ՀՀ-ի եկամուտները բավականին պետք է աճեին, քանի որ մտնում էինք բազմամիլիոնանոց տնտեսական դաշտ, միևնույն ժամանակ մաքսազերծման ԱԱՀ-ն ընդհանուր եկամուտ պետք է ապահովեր՝ այսինքն այստեղից էլ ՀՀ եկամուտները պետք է աճեին: Միևնույն ժամանակ ամեն տարի մեզ հայտնում են, որ ՊԵԿ-ն ավելի շատ հարկային մուտքեր է ապահովել, քան նախորդ տարիներին (աննախադեպ աճ եղավ նաև Հեղափոխությունից հետո): Մի քանի ոլորտներում նույնպես գրանցվեցին բավականին մեծ առաջընթացներ՝ զբոսաշրջություն, տոտալիզատորներ, ավտոմեքենաների ներկրում, վերջինի հետ կապված կունենանք շարունակական հարկային մուտքեր (վառելիք, գույքահարկ, պահեստամաս):

Միաժամանակ տեղեկանում ենք, որ իշխանությունները բավականին կրճատել են երկրի ծախսերը՝ բացահայտելով պետգնումներում գոյություն ունեցող ահռելի կոռուպցիան, որտեղ տասնապատիկ ավելի ծախսեր էին գրանցվում, քան իրականում պետք էր: Կրճատվել են գործուղումների, ծառայողական մեքենաների և նմանատիպ այլ իրողությունների վրա կատարվող ահռելի ծախսեր:

Այս ընթացքում մենք չենք տեսել թոշակների և աշխատավարձերի բարձրացում:
Այսքանից հետո հարց է առաջանում, ինչու՞ պետք է Հայաստանի 2019թ.-ի բյուջեն նորից 150 մլրդ դրամի դեֆիցիտ ունենա և ուր են կորել բոլոր հավելյալ եկամուտները:

Բացատրեք խնդրում եմ ինձ, որպես ՀՀ շարքային քաղաքացու, ում ընդհանրապես չեն հետաքրքրում ձեր խորը «տնտեսագիտական» վերլուծությունները, քանի որ ապրելով իրական աշխարհում, ամեն օր եմ տեսնում հայրենիքիս տնտեսական դեգրադացիան, այն դեպքում, երբ ես ավելի ու ավելի շատ հարկեր եմ մուծում և ավելի ու ավելի աճում են ընտանիքիս ամենօրյա ծախսերը  (մթերքների համատարած թանկացում):

ՀԳ. արագի մեջ պետք է ևս մեկ «Թավշյա Հեղափոխություն» անել՝ այս անգամ ՀՀ կառավարության տնտեսական բլոկում»։