«Ի՜, էդ ի՞նչ ես ասում»․ Դաշտ համայնքի 20 տարվա գյուղապետը՝ պետբյուջեն վատնելու մասին

Արմավիրի մարզի Դաշտ համայնքի բնակիչները դժգոհում են գյուղապետ Հրանտ Պետրոսյանի կամայականություններից։ Պետրոսյանն արդեն 20 տարի է, ինչ համայնքի ղեկավարն է։ Ասում են՝ համայնքապետ դառնալու համար նա անցել է Հանրապետական կուսակցության շարքերը, վերջին անգամ այս պաշտոնում վերընտրվել է արդեն անկուսակցականի կարգավիճակում, բայց՝ ՀՀԿ-ի դրոշմը ճակատին։

NEWSPRESS.am—ի տեղեկություններով՝ Հրանտ Պետրոսյանը խտրականություն է դնում իր մերձավորների ու մյուս գյուղացիների միջև։ Օրինակ՝ գյուղում շատ են խոսում 2016 թվականի ամռանը տեղի ունեցած կարկտահարության մասին։ Գյուղում այն ժամանակ տուժել է ավելի քան 100 տնտեսություն, սակայն, ասում են, որ Գյուղնախարարության կողմից հատկացված գումարը նա որոշակի վերապահումներով է տրամադրել համագյուղացիներին։ Ավելի ճիշտ՝ մեր տեղեկություններով՝ դրամական աջակցություն ստացել է ընդամենը 2 տնտեսություն։

«Չէ, ի՜նչ վերապահում, ի՜նչ բան․․․ Ո՞վ ասաց, որ 2 ընտանիքի եմ տվել, ես տվել եմ կարկուտից տուժած սեփականատերերին»,- մեզ հետ զրույցում ասաց գյուղապետը՝ բացատրելով, որ քիչ տուժողներ են եղել։

Նա արձագանքեց նաև այն տեղեկությանը, որ ընդամենը երկու ընտանիք է փոխհատուցում ստացել։

«Ո՞վ է ասում, սուտ են ասում․․. Ես չեմ տվել, այլ օգտվել է ամբողջ համայնքը, դեռ կողքի համայնքից էլ սեփականատեր ունենք, նրանք էլ են օգտվել։ Օգտվելը ո՞րն ա, պետության կողմից աջակցություն են տվել»։

-Այսինքն, հարևան համայնքի սեփականատերերին աջակցել եք, իսկ ձեր համայնքի տուժած բնակիչներին՝ ո՞չ։

«Հարևան համայնքին չենք աջակցել, այդ համայնքից մեզ մոտ սեփականատեր կա, նրանց ենք տվել գումարը, մեզ մոտ սեփականատերեր կան»,-ասաց գյուղապետը՝ նշելով, որ 140-ից  ավելի տուժածների է աջակցել այդ գումարով։

-Բայց մեզ մոտ կան տվյալներ, որ ոչ բոլոր տուժող սեփականատերերն են  օգտվել պետության աջակցությունից։ Համենայն դեպս, փոխհատուցում չստացած բնակիչները դժգոհել են։

«Մենք կարկուտից տուժածներին ենք տվել միայն գումար, կարող ա մեկը ցորենը հավաքել ա, հետո ասում ա՝ չեմ հավաքել, տուժել եմ, նրան ինչի պետք ա գումար տանք: Շատ տուժողներ չեն եղել։ Ցորենը 50% է տուժել, լոբին հավաքել էին, կարտոֆիլը չի տուժել, միայն ծիրանն ու խաղողն է տուժել ու էդ սեփականատերերին եմ տվել գումարը»։

Հարկ ենք համարում նկատել, որ 2016 թվականին, երբ տեղի ունեցավ կարկտահարությունը, գյուղապետն իր հարցազրույցներում հակառակն էր պնդում: Նա ասում էր, որ ամեն ինչ կարկտահարվել է, գյուղացին ձեռնունայն է մնացել, քանի որ «շուկա տանելու բան չի մնացել»։

 ․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․․

Ինչևէ, այժմ էլ գյուղապետը փորձում էր համոզել, որ քչերն են տուժել։ Ի դեպ, նա հավելեց նաև, որ փոխհատուցում են տվել նաև երկու ընտանիքի, որոնց տանիքները տուժել են կարկուտից։

Գյուղապետին հիշեցրինք, որ որ կառավարությունը վնասված կենդանիների, մեքենաների, տանիքների ու լուսամուտների համար պատասխանատվություն չի կրում։

«Ո՛չ, կառավարության կայքից տեղեկացեք»,-ասաց գյուղապետը։ 

-Ես անձամբ թեմայի շուրջ զրուցել եմ գյուղնախարարի հետ, և նա ասել է, որ նախարարությունը պատասխանատվություն է կրում միայն ցանքատարածությունների և այգիների համար։

«Վայ, ասում եմ կառավարությունն ա տվել այդ գումարը․․․ Բա հո իմ գրպանի՞ց չեմ տվել»,-բարկացած արձագանքեց Հրանտ Պետրոսյանը։

-Իհարկե, կարավարությունն է տվել, բայց կառավարությունը չի վերահսկել, թե ուր են ուղղվել այդ գումարները։

«Ի՜, էդ ի՞նչ ես ասում, մարզպետարանի կողմից վերահսկվում ա, մարզից գալիս են․․․ Հիմա չեմ հասկանում, լրագրո՞ղ եք, թե՞ ուզում եք խաչաձև հարցեր տալ։ Ինչ-որ մեկը Ձեզ խառը բաներ է ասել, դուք էլ խաչաձև հարցեր եք տալիս․․․ Վերջ»,-զայրացած ասաց գյուղապետն ու անջատեց հեռախոսը։