Չենք կարող մեր ձեռքերը լվալ ու ասել՝ թող Փաշինյանը տապալվի, մենք «աբիժնիկ» չենք․ Շարմազանով

ՀՀԿ-ն Նիկոլ Փաշինյանի միակ գաղափարական ընդդիմությունն է և չի կարող կրավորական կեցվածք ընդունել։ Այդ մասին ԱԺ-ում լրագրողների հետ զրույցի ժամանակ ասաց ՀՀԿ մամուլի խոսնակ Էդուարդ Շարմազանովը։

Նա նկատեց, որ հաշվի առնելով երկրի առջև ծառացած խնդիրներն ու մարտահրավերները՝ ՀՀԿ-ն չի կարող բոյկոտել ու չմասնակցել ԱԺ ընտրություններին։

«Մենք չենք կարող կրավորական կեցվածք ընդունել, դա ազնիվ չի լինի ո՛չ հայրենիքի, ո՛չ կառավարության, ո՛չ էլ ազգի հանդեպ։ Չենք կարող ձեռքներս լվալ ու ասել, թե ինչ ուզում է լինի՝ Փաշինյանը թող գնա, տապալվի։ Դա ոչ պետական մոտեցում է»,- ասաց Շարմազանովը։

Նա նկատեց, որ մի ուժ, որը տարիներ շարունակ իշխանություն է եղել, լավ հասկանում է այդ մարտահրավերները ու մենք ուզում ենք զերծ պահել մեր հայրենիքը ճակատագրական սխալներից: 

«Մենք աբիժնիկ չենք, մենք հայրենիքի զինվոր ենք և նմանատիպ գնահատականներն իմ համար ընդունելի չեն։ Հայրենիքի շահը վեր է ամեն ինչից։ Լավ, բա մենք այսքան բանից հետո չե՞նք գնահատում մեր անելիքը։ Ընդդիմությունը պետք է հենց նրա համար, որ զերծ պահի իշխանությանը սխալներից»,- ընդգծեց Շարմազանովը։

Պատասխանելով հարցին, թե ինչու ընտրություններին չի մասնակցում Սերժ Սարգսյանը, ում դերը միշտ այդքան կարևորվել է երկրի կառավարման գործում, Շարմազանովը նկատեց, որ այսօր ՀՀԿ-ն չի գնում ընտրությունների՝ իշխանությունը վերանվաճելու։

«Մենք լուսնից չենք իջել, և բոլորիս էլ պարզ է, որ ընտրություններում առաջին տեղը կանխանշված է․ պարզապես դեկտեմբերի 9-ին հրապարակի որոշումը պետք է լեգիտիմացվի։ Որևէ մեկը չի կասկածում, որ «Իմ քայլը» պետք է հաղթի»,-ասաց ՀՀԿ խոսնակը՝ կրկնելով, որ իրենք մասնակցում են ընտրություններին՝ ընդդիմադիր բևեռ ձևավորելու։

Շարմազանովը պատասխան ուներ նաև հարցին, թե ինչու ժողովուրդը պետք է հավատա ՀՀԿ-ին և ձայն տա իրենց։ Նրա դիտարկմամբ՝ անցած 6 ամսվա ընթացքում բացահայտվել է «նոր իշխանությունների ստերի շարան»:

«Նոր իշխանությունները, քննադատելով ՀՀԿ-ին, Հայաստանի արտաքին քաղաքական կուրսը չեն փոխել: Փաշինյանը մեզ քննադատում էր Եվրասիականի, ՀԱՊԿ-ի համար, հիմա ինքը շատ մեծ հաճույքով շարունակում է ՀՀԿ-ի կուրսը: Փաշինյանը մեզ քննադատում էր կուտակայինի համար, շատ մեծ հաճույքով իրականացնում է կուտակայինը: Փաշինյանը մեզ քննադատում էր կարմիր գծերի և տեսախցիկների համար, մեծ հաճույքով պահպանել է դրանք: Կա երկու բևեռ. ով դժգոհ է մեզնից, պետք է ընտրի Փաշինյանին, ով դժգոհ է Փաշինյանից և իրական ընդդիմության կարիք ունի, պետք է ընտրի մեզ»,- ասել է ՀՀԿ մամուլի խոսնակը:

Այսինքն՝ կա՞ն սև ու սպիտակներ, հարցին, Շարմազանովն արձագանքեց․ «Եթե Փաշինյանը սպիտակն է, ուրեմն ես սևն եմ»։