Բուհերից հեռացվում են ուսանողներ․ Արայիկ Հարությունյանը շարունակում է իր նախորդների գործելաոճը, իսկ ԿԳն-ն չի զբաղվում այդ հարցով

Ամիսներ առաջ Հայաստանում տեղի ունեցած հեղափոխության ժամանակ  կազմակերպիչներն առաջին հերթին բարձր գնահատեցին երիտասարդության ու ուսանողության դերը։

Ցույցերի հենց առաջին օրվանից բուհերում սկսվեց դասադուլ ու ակցիաներ։ Վերջնական հաղթանակից հետո էլ բոլորը բարձր գնահատեցին ուսանողության դերն ու նրանց կատարած աշխատանքը։ Այս ամենի հետ մեկտեղ պետք է նշենք, որ ներկայիս Կրթության ու գիտության նախարար Արայիկ Հարությունյանը, ով այն ժամանակ դեռ չուներ պաշտոն, Հանրապետության հրապարակի բեմից մի քանի անգամ հայտարարեց, որ ուսման վարձի համար բուհերից ուսանողները չպետք է հեռացվեն։ Միգուցե այն ժամանակ Արայիկ Հարությունյանը չէր մտածում, որ օրեր հետո ինքն է դառնալու ԿԳ նախարար։ Փաստացի, սակայն, նա այժմ ԿԳ նախարարն է։ Սա մի քանի տող անցյալի մասին։ Հիմա գանք ներկա։

Ներկայումս ամեն ինչ նորից վատ է։ Բուհերում հիմա էլ նույն վիճակն է։ Ուսման վարձի ուշացման կամ չվճարելու համար հեռացվում են ուսանողներ։ NEWSPRESS.am-ի տեղեկություններով՝ անգամ մի շարք ուսանողներ դիմում են գրել ու դուրս եկել բուհից, քանի որ չեն կարողացել սահմանված ժամկետում վարձը վճարել ու այդ դեպքում նախընտրել են դուրս գալ, այլ ոչ թե հեռացվել։

Արայիկ Հարությունյանը, ստացվում է՝ ժամանակին խոսում էր կրթական համակարգի արատի մասին, իսկ հիմա այդ արատը շարունակում է գործել։

NEWSPRESS.am-ի տեղեկություններով՝ մի շարք ուսանողներ դիմում-նամակ են գրել ԿԳ նախարարություն ու անգամ զանգահարել նախարարությունում այդ հարցերով զբաղվող համապատասխան բաժին, սակայն հարցին լուծում չեն ստացել։ Մեր տեղեկություններով՝ մի ուսանող, ով հարգելի պատճառներով չցանկացավ ներկայանալ, այս հարցով զանգահարել է ԿԳ նախարարություն ու զրուցել վարձերի հարցով զբաղվող բաժնի աշխատակցի հետ։ Աշխատակիցը նշել է, որ նախարարությունն իրեն չի կարող օգնել այդ հարցում, քանի որ կա կարգ, ու կարգի համաձայն՝ վարձ չվճարող ուսանողը հեռացվում է։

Փաստացի «Նոր Հայաստանում», «նոր ԿԳ նախարարությունում» չեն կարողանում օգնել ուսանողներին, ովքեր ցանկանում են գոնե վարձերի վճարման ժամկետները երկարացնել։ Իսկ այս դեպքում, եթե ԿԳ նախարարությունը չի կարողանում հարցին լուծում տալ, ապա տեսականորեն այս ոլորտում ոչինչ չի փոխվել։

Իսկ մյուս կողմից՝ բուհերից հեռացվում են ուսանողներ, ովքեր ամիսներ առաջ փողոց դուրս եկան «Նոր Հայաստանի» համար: Հեռացվում են ուսանողներ, ովքեր ծեծվելով ու վարկաբեկվելով՝ իշխանության բերեցին Արայիկ Հարությունյանին։ Իսկ հիմա Արայիկ Հարությունյանը վայելում է կյանքը, իսկ ուսանողները հեռացվում բուհերից։