Ցնցող շոու՝ ընտրություններից առաջ, կամ «սատանա» կա ԱԺ-ում

Հոկտեմբերի 24-ին Ազգային ժողովում՝ վարչապետ ընտրելիս կամ չընտրելիս (երկու տարբերակն էլ ճիշտ է-հեղ.), Նիկոլ Փաշինյանը սկանդալային բացահայտման անոնս տվեց: Տիպիկ լրագրողական մոտեցմամբ՝ վարչապետը նախ գլխագիրը տվեց, ապա ստիպեց աուդիտորիային սպասել իր հաջորդ եթերին:

Այսպես՝ Փաշինյանն ասաց, թե կաշառք վերցնելու գործով առաջիկայում ԱԺ պատգամավոր է կալանավորվելու:

«ԱԺ պատգամավորի վրա կա գործ՝ 100 տոկոսով ապացուցված գործ է: Արդեն երկու ամիս մենք մեր ձեռքի տակ ունեցած մի թղթի պաշտոնական պատասխանին ենք սպասում, որ օրը ստացանք, նախաձեռնություն է լինելու այդ պատգամավորին կալանավորելու վերաբերյալ: Դա կաշառքի գործ է, բայց մոտ երեք ամիս է, մի քիչ էլ կապված է օտարերկրյա դիվանագիտական ներկայացուցչության հետ, երեք ամիս է՝ այդ թուղթը չի գալիս: Սա երրորդ հանրապետության պատմության ամենախոշոր կաշառքի դեպքն է, որն իր թելերով տանելու է էլի ուրիշ բարձրաստիճան պաշտոնյաների հետևից»:

Հաշվի առնելով հանգամանքը, որ կաշառք, սովորաբար, վերցնում են գործադիր մարմնում աշխատածները, ապա սլաքներն ուղղվեց նախ բանանի արքա Միհրան Պողոսյանի վրա, որովհետև վերջինս զբաղեցրել էր ԴԱՀԿ պետի պաշտոնը, ապա՝ Արամ Հարությունյանի, ով զբաղեցրել էր Բնապահպանության նախարարի պաշտոնը: Քիչ առաջ Հատուկ քննչական ծառայության պետ Սասուն Խաչատրյանն ասաց, որ այս երկու պատգամավորները չունեն կասկածյալի կամ մեղադրյալի կարգավիճակ:

Նույն սլաքները կարող են ուղղվել նաև Արմեն Աշոտյանի վրա՝ վերհիշելով ԿԳ նախարար եղած հին ու բարի ժամանակները, Իշխան Զաքարյանի՝ Վերահսկիչ պալատի նախագահ էր:

Չի բացառվում նաև, որ դա կարող է լինել Գևորգ Կոստանյանը, ով թեկուզ արդեն մեղայականով է ներկայացել նոր իշխանություններին, բայց և չպետք է մոռանալ, որ զբաղեցրել է Գլխավոր դատախազի պաշտոնը, որն անսահման փողի աղբյուր է եղել: Ենթադրությունների այս համատեքստում կարելի է հիշել նաև Արփինե Հովհաննիսյանին, ով Արդարադատության նախարար է եղել:

Տրամաբանական այս վարկածներից զատ, չար լեզուները չեն դադարում պնդելուց, որ Նիկոլ Փաշինյանի խոսքն ուղղված էր Հերմինե Նաղդալյանին, ով հանքարդյունաբերությունից եկող ծով հարստություն է դիզել: Ըստ մամուլի՝ նա Սիսիանի բազալտի քարհանքի, խճաքարի ու ավազի հանքերի սեփականատերն է:

Ի դեպ, Նիկոլ Փաշինյանին արտահերթ ընտրություններից առաջ Մանվել Գրիգորյանի բացահայտումից առավել սկանդալային նոր բացահայտում է անհրաժեշտ և հանուն դրա, հնարավոր է, Փաշինյանն իսկապես կոռուպցիոն լրջագույն ցանց բացահայտի: Այնպես որ, հնչող կարծիքները, թե սա Փաշինյանի հերթական ոչինչ չասող անոնսն էր, այդքան էլ տեղին չէ, քանի որ նրան այս շրջանում բացահայտումները խիստ անհրաժեշտ են:

NEWSPRESS.am