Ի՞նչ է կատարվում նախագահի հետ․ սուպերվարչապետի ճնշմանը չի՞ դիմանում

Ազգային ժողովն այսօրվա հերթական նիստում ընդգրկված հարցերից մեկով քննարկեց Սահմանադրական դատարանի դատավորի թեկնածուի ընտրության հարցը։

Նշենք, որ ՍԴ դատավորի թեկնածուին առաջարկել է ՀՀ նախագահ Արմեն Սարգսյանը։

Մի քանի ժամ տևած քննարկումներից հետո, երբ դատավորի թեկնածուի հարցը դրվեց քվեարկության, պարզվեց, որ այն չկայացավ համապատասխան քանակի քվորում չապահովվելու պատճառով։

Վահե Գրիգորյանին ՍԴ դատավոր ընտրելու համար անհրաժեշտ էր 63 պատգամավորի քվե, մինչդեռ նրա օգտին քվեարկեց 30, դեմ՝ 23 պատգամավոր։

Հիմա դառնանք նախագահ Արմեն Սարգսյանի որոշմանը: 

Ինչո՞ւ է Սարգսյանը ՍԴ դատավորի թեկնածու առաջարկել մի փաստաբանի, ով ամիսներ շարունակ բարձրաձայնել է, որ Արմեն Սարգսյանը լեգիտիմ նախագահ չէ և ոչ միայն բարձրաձայնել է իր տարբեր հարցազրույցներում, այլ այսօր իր տեսակետը վերահաստատեց խորհրդարանում։

Այսօր լրագրողների հիշեցմանը, որ մինչ ՍԴ դատավորի թեկնածու առաջադրվելը նախագահ Արմեն Սարգսյանին բազմիցս քննադատել է՝ անվանելով ոչ լեգիտիմ, Գրիգորյանը պատասխանեց․

«Արմեն Սարգսյանի լեգիտիմության հարցի վերաբերյալ իմ արտահայտած դիրքորոշումն ուժի մեջ է: Դա շարունակում է իմ դիրքորոշումը մնալ»։

Վերլուծելով իրերի դասավորությունը՝ մեզ այլ բան չի մնում անելու, քան ենթադրել, որ Արմեն Սարգսյանը Նիկոլ Փաշինյանի պահանջով է Վահե Գրիգորյանին առաջադրել ՍԴ դատավորի թեկնածու և ստացվում է՝ սուպերվարչապետը ճնշել է նախագահին։

Հավելենք նաև, որ, ըստ մամուլի հրապարակման, Վահե Գրիգորյանը Ադրբեջանից գումար է վերցրել և տապալել մեր հայրենակցի՝ ՄԻԵԴ դիմումը այդ պետության դեմ։ Մամուլում գրվեց նաև, որ Վահե Գրիգորյանը փաստացի տապալել է Ադրբեջանին այդ հեղինակավոր դատական ատյանում պատասխանատվության ենթարկելու ամենահեռանկարային գործը: «Խոսքը վերաբերում է 2014 թվականի օգոստոսի սկզբին ադրբեջանցիների մոտ հայտված Չինարեցի տարաբախտ Հովիվ Կարեն Պետրոսյանի գործին: Բոլորս հիշում ենք այդ ահավոր տեսանյութը, թե ինչպես էին նրան անմարդկային պայմաններում ծնկի իջեցնում ադրբեջանցի բարձրաստիճան սպայի առջև, ինչպես էին ծաղրում սահմանը պատահմամբ հատած այդ խեղճ տղային: Հաջորդ օրն էլ Ադրբեջանը լկտիաբար հայտնեց, որ Կարենը բանտում գտնվելով, սրտի կանգից մահացել է: Բոլորիս էլ պարզ էր, որ նա ենթարկվել է անմարդկային խոշտանգման ու պատժվել է մահվամբ», գրել էր «Փաստ» օրաթերթը։

Հետաքրքիր է՝ Արմեն Սարգսյանն այս սկանդալային հրապարակման մասին չգիտե՞ր, թե՞ այնուամենայնիվ՝ ճնշումն իր գործն արել է։

NEWSPRESS.am