«Իրեն հարգող որևէ քաղաքական ուժ չի կարող ընդունել պարտադրանքը»․ ինչո՞ւ ՀՅԴ-ն չմիացավ ստորագրահավաքին

ԱԺ ՀՅԴ խմբակցության ղեկավար Արմեն Ռուստամյանը լրագրողների հետ զրույցում անդրադարձավ հարցին, թե ինչու չմիացան Ընտրական օրենսգրքի փոփոխությունների համար արտահերթ նիստ հրավիրելու ստորագրահավաքին:

«Շատ պարզ պատճառով չմիացանք ստորագրահավաքին. նախ, համահեղինակ հանդես չենք գալիս նախագծին, իսկ եթե համարում ենք, որ իրավիճակ է փոխվել և պետք է նաև մասնակցությամբ լինի այս նախաձեռնությունը, ուրեմն պետք է նաև ընդունել մեր առաջարկները»,- նկատեց Արմեն Ռուստամյանը։

Նա նշեց, որ իրենց խմբակցությունը ներկայացրել է 3 առաջարկ, որոնք թեև համաձայնեցված են եղել բոլորի հետ, սակայն չեն ընդունվել: Դրանցից մեկը՝ բաց համամասնական ընտրակարգի առաջարկն է։

«Այս պարագայում չգնալ ավելի ժողովրդավարական ընտրակարգով ընտրության, մեզ համար անհասկանալի է: Բոլոր բերվող պատճառաբանություններն անհիմն են, անտրամաբանական, միայն վերաբերում են ժամկետներին, տեխնիկական ինչ-որ խնդիրների, որոնք, բնականաբար, չեն կարող ավելի գլխավոր լինել, քան այն արժեքը, որն ամբողջ աշխարհն ընդունում է, որ բաց ցանկերով համամասնական ընտրությունը ժողովրդավարական է․ այսինքն՝ մարդն ընտրում է ոչ միայն ցուցակը, այլև նախապատվություն է տալիս, թե այդ ցուցակից կոնկրետ ով պետք է մանդատ ստանա»,-ասաց Արմեն Ռուստամյանը:

ՀՅԴ-ի առաջարկներից մեկն էլ ընտրակեղծիքների ծավալն արձանագրելու գործիքի ստեղծումն է։ Ըստ Արմեն Ռուստամյանի՝ միշտ կեղծիքներ լինում են, բայց ամեն անգամ էլ հայտարարում են, թե դրանք չեն ազդել ընտրության արդյունքների վրա։ Նա նկատում է, որն իրենք առաջարկում են եղանակ, որ արձանագրվեին ոչ միայն կեղծիքները, այլև կեղծիքների ծավալը, ու դա հնարավորություն կտա դատարանում փաստարկված վիճարկել ընտրությունների արդյունքները: Այս առաջարկը, սակայն, ևս չի ընդունվել։

Ամեն դեպքում՝ Արմեն Ռուստամյանը վստահեցնում է, որ ինչպես երեկ մասնակցել են ԸՕ փոփոխությունների քվեարկությանը և կողմ են քվեարկել, այնպես էլ երկուշաբթի կգան և կքվեարկեն կողմ, բայց որպես համահեղինակ հանդես չեն գա:

«Ոչ ոք չի կարող ծրագրերն առանց մեզ հետ քննարկելու ստիպել, որ մենք մաս կազմենք դրան, Դաշնակցությունն այդ կուսակցությունը չէ, պիտի սովորեն աշխատել Դաշնակցության հետ: Եթե մենք մի բանի մշակման մեջ մասնակից չենք, ուրեմն չենք էլ միանում»,- ընդգծեց նա:

Ինչ վերաբերում է նրան, թե ԸՕ-ի քվեարկության ժամանակ սաբոտաժ է եղել, ապա, ըստ Ռուստամյանի, դա եղավ դեկտեմբերին ընտրություններ անցկացնելու անսպասելի որոշման պատճառով։

«Եթե պարտադրանքով՝ «ինչ ուզենամ՝ կանեմ»-ով է, և դուք պարտավոր եք համակերպվել մեր բերած ընթացակարգին, իրեն հարգող որևէ քաղաքական ուժ չի կարող ընդունել պարտադրանքը, վերջնագիրը»,- նկատեց նա: