Մինասյանի մատը խա՞ռն է

Հասարակությունն այսօր ստացավ հերթական թիկունքից հարվածն իր պաշտելի Փաշինյանից:

Պարզվում է՝ Հայկական գորգի ազգային կենտրոնի տնօրեն, Երևանի ավագանու «Իմ Քայլը» խմբակցության անդամ Վիկտոր Մնացականյանին առաջարկվել է զբաղեցնել Երևանի կենտրոն վարչական շրջանի ղեկավարի պաշտոնը, և թեև դեռ պաշտոնական որոշում չկա, սակայն Մնացականյանը հաստատել է, որ համաձայն է այդ առաջարկին. դե, բնականաբար, ո՞վ ձեռքից բաց կթողներ Կենտրոնի պես հարուստ վարչական շրջանի ղեկավար լինելու առիթը:

Թե ով է Մնացականյանն, ինչ գործով է զբաղվել նախկինում, ունի քաղաքական անցյալ, թե ոչ՝ հասարակությանը չէր հետաքրքրի, եթե սույն թաղապետացուի վերաբերյալ չլիներ մեկ ականջ ծակող տեղեկատվություն:

Վիկտոր Մնացականյանը ոչ ավել, ոչ պակաս՝ Սերժ Սարգսյանի փեսա Միքայել Մինասյանի սանիկն է, և ինչպես Լենա Նազարյանն է ասում՝ թավշյա հեղափոխության օրերին հայտնի գորգերով ակցիայի հեղինակը, որը չի բացառվում, որ Միքայլել Մինասյանի հորդորով արած լինի:

Ինչ է ստացվում՝ մի ողջ ժողովուրդ իր ազնվագույն նպատակների համար կանգնել և իշխանափոխություն է արել և Փաշինյանին կարգել իշխանավոր, որպեսզի քոքից կտրի Սերժ Սարգսյանի հետ կապող ցանկացած բան, բայց արի ու տես, որ Փաշինյանն իշխանության է բերում տարբեր տերերի ծառայածների ու քավոր-սանիկական կապերով կապվածների, որոնց հասարակությունը պարզապես չի վստահում:

Իսկ այս պաշտոնյաները և նրանք, որոնք դեռ բարիկադները քանդելու անվան տակ հայտնվելու են երկրի համար կարևորագույն պոստերում, վտանգում են հեղափոխության հաղթանակն ու զրոյացնում Փաշինյանի՝ արդեն ոչ բարձր վարկանիշը:

Ու թեև Վիկտոր Մնացականյանն ասում է, որ Միքայել Մինասյանի սանիկը լինելը խարան չէ և որևէ մեկին էլ հաշվետու չէ իր անձնական և ընտանեկան կապերի հաստատման համար, սակայն սույն պարոնին հարկ է հիշեցնել, որ իրեն առաջարկվել է Կենտրոնի վարչական շրջանի և ոչ թե մի մասնավոր խանութի տնօրենի պաշտոնը, և, հետևաբար, հաշվետու է կենտրոնցիներին և երևանցիներին առաջին հերթին, որոնց տված քվեների շնորհիվ էլ կարողացել է մուտք գործել Երևանի քաղաքապետարան:

Իսկ հարցի մյուս կողմը Նիկոլ Փաշինյանն է, որը կարծես թե ստանձնել է միանձնյա որոշումներ ընդունելու գործառույթը՝ մոռանալով հրապարակում կանգնել և ժողովրդին հարցնել՝ իսկ իրեն տվե՞լ են միանձնյա որոշումներ կայացնելու թույլտվություն:

NEWSPRESS.am