Քարոզ՝ գործի ժամին. երևանյան «տրյուկը» հասել է մարզեր

Հոկտեմբերի 21-ին ՏԻՄ ընտրություններ են տեղի ունենալու Հայաստանի մի շարք քաղաքներում, որոնցից են Էջմիածինը, Հրազդանը, Արմավիրը, Կապանը: Այս քաղաքներում քաղաքապետերի թեկնածուներ են առաջադրվել Նիկոլ Փաշինյանի քաղաքական թիմից, և Երևանի ավագանու օրինակով՝ Փաշինյանն անձամբ է գնում և մասնակցում իր թեկնածուների քարոզարշավներին:

Եթե հոկտեմբերի 18-ին Փաշինյանը Էջմիածին քաղաքում էր և աջ ու ձախ բոլորին հորդորում էր քվեարկել իր քաղաքական թիմի թեկնածուի՝ Դիանա Գասպարյանի օգտին, այսօր արդեն Փաշինյանը Կապանում էր ու կրկին դուխով քարոզ էր անում իր թիմակիցների համար:

Այսօր ՀՀ վարչապետի պաշտոնակատար Նիկոլ Փաշինյանը Կապանում քաղաքապետի թեկնածու Նարեկ Բաբայանի նախընտրական հանրահավաքի ժամանակ հայտարարեց, որ Կապանի քաղաքապետի իրենց թեկնածուն քրեական տարր չէ.
«Ես հորդորում եմ այս կիրակի գնալ ընտրական տեղամասեր ու մասնակցել ընտրություններին: Ես չեմ ասում, թե այս ընտրությունների ընթացքում պետք է Նարեկ Բաբայանը հաղթի կամ մեկ այլ թեկնածու, ես ասում եմ, որ պետք է դու՛ք հաղթեք»,-ասաց Փաշինյանը՝ օգտագործեկով նույն հաջողված «տրյուկը», որը լավ աշխատեց Երևանի ավագանու ընտրութունների ժամանակ:

Հետաքրքրական է, որ Փաշինյանը միայնակ չի մասնակցում իր թիմակիցների քարոզարշավին. դրան լծված է ողջ Կառավարությունը:

Հետաքրքիր է՝ ով պետք է աշխատի այն ժամանակ, մինչ Կառավարության ժամանակավոր պաշտոնակատարները ակտիվորեն քարզչությամբ են զբաղվում:
Արդյոք ԿԸՀ-ը հետամուտ է՝ պարզելու, թե աշխատանքային քանի ժամ են վարի տվել Փաշինյանն ու իր նախարարների պաշտոնակատարները՝ էյֆորիկ տրամադրությունները մարզեր հասցնելու համար:

Եթե նման բան տեղի ունենար հանրապետականի իշխանության տարիներին՝ ընդդիմադիր պատգամավոր Նիկոլ Փաշինյանն այս հարցը բարձրաձայնելու համար մի ողջ լիագումար նիստ կօգտագործեր, իսկ հիմա՞ ով է այդ լիագումար նիստերն օգտագործելու վարչապետի պաշտոնակատարի և նրա թիմակիցների կողմից օրենքի խախտումներն արձանագրելու և պատասխան պահանջելու համար:

NEWSPRESS.am