Առաջիկայում ՀՀԿ-ականները հնարավոր է պաշտոններ ստանան. Փաշինյան

Վարչապետի ժամանակավոր պաշտոնակատար Նիկոլ Փաշինյանը տեղյակ է, որ երեկ՝ հոկտեմբերի 16-ին, սյունեցիները փակել են ճանապարհը՝ ի նշան բողոքի։ Վերջիններս չեն ցանկացել, որ նախկին իշխանության օրոք փոխոստիկանապետի պաշտոնն ստանձնած Հունան Պողոսյանն իրենց մարզպետ դառնա։ Նիկոլ Փաշինյանը գիտի նույնիսկ, որ բողոքողները «Քաղաքացիական պայմանագիր» կուսակցության անդամներ են եղել։

Նա այդ դժգոհությունները նորմալ է համարում և չի բացառում, որ առաջիկայում նոր «բացասական արձագանքի արժանի» նշանակումներ կլինեն, քանի որ հնարավոր է նաև պաշտոններ ստանան ՀՀԿ-ականները։ Ավելին՝ այսօր էլ մի քանի հանրապետական փոխնախարարների ինքն անձամբ է նշանակել այդ պաշտոններում։

«Որևէ նշանակում չի եղել, որ բացասական արձագանքի չարժանանա։ Մեկը երիտասարդ է, մեկը շատ տարիքով է, մյուս բոյով է, մյուսն այնքան էլ բոյով չէ։ Այսինքն` անթերի մարդիկ ՀՀ-ում չկան։ Եվ անթերի նշանակումներ չեն լինում»,- ասաց նա։

Դիտարկմանը, թե նորանշանակ պաշտոնյաներից ոմանք նախկինում ինչ-որ ապօրինություններ են արել, Փաշինյանն ասաց, որ բոլորն իրենց արարքների համար պատասխան կտան՝ անկախ պաշտոնից։

«Ով ինչ արել է, իր արածի համար պատասխան կտա, կապ չունի` նա պաշտոնյա է, թե ոչ։ Անցել են այդ ժամանակները, երբ պաշտոնյա լինելն արտոնություն էր»։

Փաշինյանը նորից հիշեցրեց, որ նոր ժամանակներ են մտնում, որտեղ բարիկադները ապամոնտաժվում են։

«Մտել ենք բարիկադներն ապամոնտաժելու փուլ։ Այստեղ Հունան Պողոսյանի խնդիրը չէ, այստեղ քաղաքական ուղերձի խնդիրն է։ Եվ այդ քաղաքական ուղերձն այն է, որ մենք թշնամիների, մերոնքականների ու ձերոնքականների չենք բաժանելու»,- ասաց նա։