Հովիկ Աբրահամյանն էլ չէ. ՀՔԾ-ն փնտրում, բայց չի գտնում

Հատուկ քննչական ծառայության պետ Սասուն Խաչատրյանն այսօր, Երևանի քաղաքապետարանում, լրագրողների հետ զրույցում նշել է, որ ՀՀ նախկին վարչապետ Հովիկ Աբրահամյանին փաստացի պատկանող տարածքներում հայտնաբերված զենքերի փորձաքննությունն ավարտվել է և դրանք կապ չունեն «Մարտի 1»-ի իրադարձությունների հետ, համընկնում չկա:

Սա Սասուն Խաչատրյանն ասում է այն բանից հետո, երբ շատ կարճ ժամանակ առաջ տարածվեց ԲԱՑԱՌԻԿ տեսանյութ այն մասին, որ Հովիկ Աբրահամյանին փաստացի պատկանող տարածքից հայտնաբերվել է մեծաքանակ սպառազինություն, որը ենթադրաբար կրակել է տաս տարի առաջ՝ 2008-ի արյունոտ իրադարձությունների օրերին։

Ի՞նչ է սա՝ Մարտի 1-ի գործի բացահայտո՞ւմ, թե՞ սովորական մասկի-շոու: Արդյո՞ք Ազգային անվտանգության ծառայությունն ու Հատուկ քննչական ծառայությունը գտնվում են մարդկանց ձեռքերում, ովքեր պրոֆեսիոնալիզմի բացակայության արդյունքում ևս մի քանի նման խայտառակ տապալում անելով՝ կարող են հողին հավասարեցնել Մարտի 1-ի և տասը զոհերի սպանության բացահայտման հույսը, որը ժողովրդի մեջ ծնեց վարչապետ Նիկոլ Փաշինյանը:

Մի՞թե ՀՔԾ-ն ու ԱԱԾ-ն նախապես մարդկանց մասին հաղորդագրություններ են անում, հետո որոշում, թե ինչ մեղադրանք «կարեն» նրանց վրա:

Սա կրկնում է նախորդների գործելաոճը, պարզապես մի բացառությամբ. նախորդները պրոֆեսիոնալներ էին, իրենց գործի գիտակ, գիտակ՝ նաև խախտումներ անելիս:

Հասարակությունը կարող է Նիկոլ Փաշինյանին չներել նման կարևորագույն գործն այս որակի մարդկանց վստահելու համար, որոնց խայտառակ թերացումների արդյունքում արդեն իսկ «ջրից չոր են դուրս եկել» Յուրի Խաչատուրովը, ՀՀ պաշտպանության այն ժամանակվա նախարար Միքայել Հարությունյանը:

Փաստորեն, Սասուն Խաչատրյանն այսօրվա իր խոսքով ցրեց Հովիկ Աբրահամյանի՝ Մարտի 1-ի դեպքերի առնչության մասին հյուսած խճճված պատմությունը:

Եթե Մարտի 1-ի գործի բացահայտումը ԱԱԾ-ն ու ՀՔԾ-ն շարունակելու են նույն էժանագին PR տեխնոլոգիաներին զարկ տալով, ոչ թե լուրջ գործ անելով, ապա այդ արյունոտ ոճրագործության չբացահայտման պատասխանատուները կլինեն այս երեքը՝ Նիկոլ Փաշինյան, Սասուն Խաչատրյան, Արթուր Վանեցյան:

NEWSPRESS.am