Ստորագրված հուշագիրը ժողովրդի կամքի թելադրանքն է

Նիկոլ Փաշինյանի և Գագիկ Ծառուկյանի միջև ստորագրված հուշագիրը ոչ այլ ինչ է, քան փաստերի արձանագրում: Չկար մի կետ, որ կողմերից մեկը ժամանակ առաջ տարբեր առիթներով հայտարարած չլիներ: Տպավորիչ է նաև այն հանգամանքը, որ անգամ հուշագրով լույս սփռվեց այն փաստին, որ «Ծառուկյան» դաշինքը հեղափոխության աջակից ուժ է եղել և կանգնած է եղել ժողովրդի կողքին՝ աջակցելով արտահայտած պահանջների իրականացմանը: Այսպիսով, ընդդիմախոսներին ասելու ոչինչ չմնաց, քան հարմարվել մտքին, որ Ծառուկյանը չի դավաճանել իր արտահայտած մտքերին և սատար է կանգնած իր քաղաքացուն:

Պետք է արձանագրել, որ հուշագիրը հանուն ժողովրդի և մեր երկրի զարգացմանը միտված փաստաթուղթ էր, որի կատարումը կարող է միայն բարեկեցություն ապահովել Հայաստանի քաղաքացուն:

Իզուր չէ, որ Ծառուկյանն իր հարցազրույցներում և քաղաքական տարբեր շրջաններում մշտապես հայտարարել է՝ ինքը ժողովրդի կողքին է և կկատարի ժողովրդի կամքը: Շատ էր խոսվում այն մասին, որ երկրի, հատկապես տնտեսական հատվածի զարգացման համար, հեղափոխական թիմին հարկավոր է ամուր հենարան և այս դեպքում Գագիկ Ծառուկյանը՝ օգտագործելով օտարերկրյա ներդրողների հետ ունեցած իր կապերը, կկարողանա այդ ամուր հենարանը լինել և էապես տնտեսական ակտիվություն մտցնել մեր երկրում:

Այս տեսանկյունից հուշագրի ստորագրումը բավականին հեռատես քայլ էր երկու գործիչների կողմից էլ, քանի որ նման համագործակցությունը կբերի համատեղ ուժերով հետհեղափոխական կայունացման փուլ սկսելուն:

Բացի այդ, քաղաքական առումով ևս Փաշինյան և Ծառուկյան համագործակցությունը, կարելի է ասել, տրամաբանական և կառուցողական էր: Հուշագրի առաջին կետով սահմանվում է, որ կողմերը համակարծիք են 2018 թվականի դեկտեմբեր ամսվա ընթացքում Հայաստանի Հանրապետության՝ արտահերթ խորհրդարանական ընտրություններ անցկացնելու վերաբերյալ:

Չնայած այն հանգամանքին, որ Գագիկ Ծառուկյանն արդեն իսկ հայտարարել էր՝ իրենք պատրաստ են և ցանկություն ունեն արտահերթ ընտրություններ անցկացնելու, միայն թե՝ ԸՕ օրենսգրքի փոփոխություններից հետո, բայց հուշագրով մտադրությունները սևով սպիտակի վրա գրվեցին: Շատերը կհիշեն Ծառուկյանի ելույթներն այն մասին, որ պնդում էր՝ փոփոխել ԸՕ-ն, այնուհետև անցնել ընտրական փուլին: Այսօր արդեն խոսվում է այն մասին, որ ԸՕ բարեփոխումների նախագիծն արդեն ուղարկվել է Վենետիկի հանձնաժողով. հուշագրի այս կետը կարելի է քայլ առաջ որակել ընդհանուր համագործակցության մեջ:

Առհասարակ, Փաշինյան-Ծառուկյան զրույցի տեսանյութից ակնհայտ է դառնում, որ հուշագիր ստորագրել են ոչ թե տարբեր բևեռներում գտնվող քաղաքական ուժեր, այլ գործընկերներ, ովքեր ունեն նույն նպատակները՝ աշխատել երկրում մարդու իրավունքների պաշտպանության մակարդակը բարձրացնելու, Հայաստանի և Արցախի անվտանգությունն ամրապնդելու, սփյուռքի հետ արդյունավետ համագործակցությունը խորացնելու, Հայաստանում օտարերկրյա ներդրումների իրականացմանը նպաստելու, երկրում խորքային սոցիալ-տնտեսական բարեփոխումներ իրականացնելու ուղղությամբ:

NEWSPRESS.am